Habambuhay na kulong, nakaamba sa 25 DPWH execs, contractors -

Non-bailable at habang-buhay na kulong ang kakaharapin ng 20 opisyal ng Department of Public Works and Highways (DPWH) at lima na pribadong kontratista matapos silang sampahan ng kasong graft and corruption at malversation of public funds kaugnay ng maanomalyang flood control projects sa Bulacan.

Personal na inihain ni DPWH Secretary Vince Dizon ang mga kaso sa Office of the Ombudsman laban sa mga tauhan ng Bulacan 1st District Engineering Office (DEO), kabilang sina dating District Engineer Henry C. Alcantara; former Assistant District Engineer Brice Ericson D. Hernandez; Construction Section Chiefs Jaypee D. Mendoza and John Michael E. Ramos; Planning and Design Section Chief Ernesto C. Galang; OIC Maintenance Section Chiefs Lorenzo A. Pagtalunan and Jaime R. Hernandez; Quality Assurance Section Chief Norberto L. Santos; Administrative Section Chief Floralyn Y. Simbulan; Finance Section Juanito C. Mendoza; Budget Unit Head Roberto A. Roque; Procurement Unit Head Benedict J. Matawaran; Cashier Christina Mae D. Pineda; and Project Engineers Paul Jayson F. Duya, Merg Jaron C. Laus, Lemuel Ephraim C. Roque, Arjay S. Domasig, John Carlo C. Rivera, John Benex S. Francisco at Engr. Jolo Mari V. Tayao.

Kasama rin rin sa sinampahan ng kaso ay sina Sally N. Santos ng SYMS Construction Trading; Mark Allan V. Arevalo ng Wawao Builders; Ma. Roma Angeline D. Rimando at Cezarah Rowena C. Discaya ng St. Timothy Construction Corporation; at Robert T. Imperio ng IM Construction Corporation.

Ayon kay Dizon, malinaw na hindi ito mga ordinaryong iregularidad kundi isang malawakang operasyon ng korapsyon.

“Malalim ito, top to bottom… This is corruption in a scale not seen before. The Napoles scandal is like petty change compared to this,” giit niya.

Idiniin ni Dizon na bago bumiyahe si Pangulong Ferdinand Marcos Jr. patungong Cambodia, malinaw ang bilin nito na “Enough talk, enough process, now is the time to act.”

Dagdag pa ng kalihim, personal na nakita ng Pangulo ang kalunos-lunos na sitwasyon ng mga taga-Bulacan matapos ang matinding pagbaha at nadiskubre mismo ang mga proyekto na peke o kulang sa kalidad.

Hinimok din ni Dizon ang publiko na magsumbong ng mga kahina-hinalang proyekto sa kanilang lugar.

“I-channel po natin ang galit natin para huliin pa ang mga ito. Padala niyo po sa amin at sisiguraduhin naming maisasama sa mga susunod na kaso,” aniya.

Samantala, nang tanungin kung maaari bang gawing state witness ang mag-asawang Sara at Curlee Discaya na unang nagbunyag ng anomalya, mariing sagot ni Dizon na, “Hindi po ako abogado pero alam ko, ‘yung most guilty hindi puwede. And I think the Discayas are one of the most guilty here.” (MINA PADERNA)