BULACAN — Nagpahayag ng pagkabigla at galit si Governor Daniel Fernando matapos malaman na mahigit 600 flood control projects sa Bulacan na nagkakahalaga ng ₱6.5 bilyon ay opisyal nang nakumpleto sa papel ngunit sa katotohanan ay hindi natapos o substandard ang pagkakagawa.
Ayon kay Fernando, labis siyang nagulat nang ibunyag ni Pangulong Ferdinand “Bongbong” Marcos Jr. kamakailan na Bulacan ang may pinakamaraming flood control projects sa buong bansa. Ani ng gobernador, hindi rin siya o ang mga alkalde sa lalawigan ang naabisuhan tungkol sa mga proyektong ito na ipinatupad ng Department of Public Works and Highways (DPWH).
“Walang naganap na complete project. Parang naging ghost yun… It’s substandard. Yun nangyari,” ani Fernando.
Dagdag pa niya, habang nagsumite ng completion reports ang mga kontraktor sa Malacañang, sa aktwal na inspeksyon sa site ay hindi nagawa ang dredging at desilting na nakasaad sa kontrata.
Legal Action at Blacklisting
Iniutos ni Fernando sa Provincial Administrator, Legal Office, at Engineering Office na magsagawa ng inspeksyon, mangalap ng ebidensya, at ihanda ang legal action laban sa mga kontraktor. Aniya, plano rin niyang maglabas ng executive order na magba-blacklist sa mga kontraktor na mapatutunayang may sala.
“Didemandan natin yung mga responsible dyan… Kinakailangan managot sila. Maaari rin silang pagbawalan sa future projects sa Bulacan,” dagdag ng gobernador.
Hinikayat din niya si Pangulong Marcos na personal na pangunahan ang imbestigasyon sa halip na umasa lamang sa mga opisyal ng DPWH, dahil umano unang naloko ng pekeng completion reports ang pangulo.
Hindi Kasali ang Lokal na Pamahalaan
Ipinaliwanag ni Fernando na walang kinalaman ang provincial government sa mga proyekto, na ipinatupad ng DPWH nang walang koordinasyon sa lokal na awtoridad. Binanggit din niya na limitado lamang ang taunang budget ng lalawigan sa humigit-kumulang ₱7 bilyon, na para sa pangunahing serbisyo at mas maliliit na imprastruktura tulad ng mga barangay road at paaralan.
Epekto sa mga Residente
Ipinahayag ng gobernador ang kanyang pagkabahala sa epekto ng isyu sa mga Bulakenyo, na patuloy na nakararanas ng pagbaha kahit na milyon-milyong pisong ginastos sa flood control. Ayon kay Fernando, paulit-ulit na nasisira ang mga gamit at appliances ng pamilya sa baha, na nagpapatuloy sa kahirapan.
“Kawawa yung mga kababayan natin. Yung mga bahay, nagtambak yung mga gamit sa labas. Nasira na. Ang dumi-dumi,” ani Fernando. Pinangako ng gobernador na ipagpapatuloy niya ang pananagutan at transparency sa mga susunod na proyekto at masusubaybayan ang imbestigasyon sa kanilang mga komunidad.
About the Author
