Nilinaw ng Department of Justice (DOJ) ngayong Huwebes na hindi maituturing na “arrested” o inaresto sa ilalim ng batas ng Czech Republic ang dating kinatawan ng Ako Bicol Partylist na si Elizaldy “Zaldy” Co.
Ang paglilinaw na ito ay ginawa pitong araw matapos ipost ni Pangulong Ferdinand Marcos Jr. sa social media noong ika-16 ng Abril na naaresto na si Co sa Prague.
Nauna na ring binatikos ng Malacañang bilang “fake news” ang naging pahayag ni dating Presidential Spokesperson Harry Roque na nagsabing walang rekord ng anumang pag-aresto sa mambabatas sa naturang bansa.
Sa isang panayam, ipinaliwanag ni DOJ Spokesperson Atty. Polo Martinez na mahalagang maging maingat sa paggamit ng mga legal na terminolohiya.
Ayon kay Martinez, hindi inaresto si Co sa Czech Republic dahil wala itong kinakaharap na anumang warrant doon; sa halip, ang mambabatas ay “natagpuan” at kasalukuyang nasa ilalim lamang ng kustodiya matapos ipaalam ng gobyerno ng Czech Republic sa Pilipinas ang kanyang presensya.
Binigyang-diin ni Martinez na magkaiba ang hurisdiksyon ng dalawang bansa. Dahil ang mga kaso ni Co ay nakabinbin sa Pilipinas, hindi maaaring magpataw ng batas ang ating bansa sa isang soberanyang estado tulad ng Czech Republic.
Sa kasalukuyan, hindi pa rin idinidetalye ng mga awtoridad sa Prague kung aling ahensya ang may hawak kay Co.
Dahil sa maselang prosesong ito, wala pang tiyak na petsa kung kailan maibabalik si Co sa Pilipinas.
Ayon sa DOJ, nakadepende ang lahat sa magiging koordinasyon at pagsunod sa mga batas ng Czech Republic sa ilalim ng international comity.
Upang pormal na simulan ang mga negosasyon, tumulak na patungong Czech Republic si Justice Secretary Fredderick Vida kasama si Chief State Counsel Dennis Chan.
Kasama rin sa delegasyon ang mga opisyal mula sa Department of Foreign Affairs (DFA) at Philippine Center for Transnational Crime upang tuklasin ang mga legal na paraan para sa posibleng pagpapabalik sa dating mambabatas.
About the Author
