Isang malalimang imbestigasyon ang kasalukuyang isinasagawa ng lokal na pulisya hinggil sa pagpaslang sa isang guro at dating beauty queen na binaril sa harap ng kanyang tahanan sa Barangay Cabaritan nitong Biyernes ng gabi, Pebrero 13.
Kinilala ng San Manuel Police Station ang biktima na si Lullete Jane Ramilo-De Guzman, 32-anyos. Ayon sa ulat ni P/Maj. Rogelio Natividad, hepe ng lokal na pulisya, naganap ang insidente bandang alas-6:45 ng gabi habang ang biktima ay lulan ng kanilang Toyota Fortuner kasama ang kanyang tatlong anak at ama.
Batay sa paunang pagsisiyasat, pansamantalang bumaba ang ama ng biktima upang buksan ang gate ng kanilang bahay nang lumapit ang isang hindi pa nakikilalang salarin na angkas ng isang motorsiklong walang plaka.
Malapitang pinagbabaril ang biktima na nagtamo ng mga sugat sa mukha at tagiliran. Bagaman mabilis na naisugod sa Manuel Roxas District Hospital, idineklara itong dead on arrival.
Mapalad namang hindi nasugatan ang tatlong anak ni De Guzman na nasa loob din ng sasakyan, bagaman labis na trauma ang idinulot ng pagsaksi sa nasabing karahasan. Ang salarin ay mabilis na tumakas patungong silangan sa kahabaan ng national road.
Si De Guzman ay kilala sa kanilang lalawigan bilang dating Miss San Manuel at naging runner-up sa prestihiyosong Miss Philippines-Earth 2013 pageant, kung saan nakamit din niya ang mga titulong Miss Global International at Miss Genuine Person.
Bukod sa kanyang karera sa pageantry, siya ay nagsisilbi bilang isang guro sa kanilang komunidad.
Sa kasalukuyan, narekober ng mga otoridad ang tatlong basyo ng bala sa pinangyarihan ng krimen at nagsasagawa na ng backtracking sa mga CCTV footage sa lugar.
Sinusuri na rin ng mga investigator ang lahat ng posibleng anggulo at motibo sa likod ng nasabing pamamaslang upang agad na maikasa ang operasyon para sa ikadarakip ng mga suspek.
About the Author
