Nagbitiw sa puwesto sina Executive Secretary Lucas Bersamin at Budget Secretary Amenah Pangandaman, inanunsyo ng Malacañang sa isang biglaang press briefing nitong Lunes ng hapon, Nobyembre 17.
Kinumpirma ni Palace press officer Undersecretary Claire Castro na tinanggap ni Pangulong Ferdinand Marcos Jr. ang resignation ng dalawang opisyal.
Ayon kay Castro, “Both officials respectfully offered and tendered their resignations out of delicadeza after their departments were mentioned in allegations related to the flood control anomaly currently under investigation, and in recognition of the responsibility to allow the administration to address the matter appropriately.”
Itinalaga si Finance Secretary Ralph Recto bilang kapalit ni Bersamin bilang executive secretary, ang ikatlo sa pinakamataas na posisyon sa ilalim ng Marcos administration. Papalitan naman ng Presidential Assistant for Investment and Economic Affairs na si Frederick Go si Recto sa Department of Finance.
Si Bersamin, dating chief justice, ay naitalagang ES noong Setyembre 2022 matapos ang maikling panunungkulan ni Vic Rodriguez.
Si Recto, dating senador at kongresista, ay nagsilbi ring NEDA chief mula 2008 hanggang 2009, at naitalagang finance secretary noong Enero 2024.
Puri ni Castro: “Secretary Recto’s long record in economic policymaking, fiscal legislation, and national planning positions him well to oversee the day-to-day operations of government and coordinate the implementation of high-impact programs.”
Tungkol naman sa bagong DOF chief: “Secretary Go has played a central role in advancing investments, strengthening investor confidence… He will now oversee the country’s fiscal direction and the administration’s economic agenda.”
Nagpasalamat si Go sa Pangulo at sinabing nakatuon siya sa “fiscal strength and sustainable economic growth.”
Samantala, magsisilbing OIC ng DBM si Budget Undersecretary Rolando Toledo matapos ang pag-alis ni Pangandaman.
Kasabay ng anunsyo, nagpaabot agad ng pagbati si Senator Erwin Tulfo kay Recto. Naroon sina Recto at Pangandaman sa Senado para sa plenary debates ng 2026 national budget.
Matagal nang usap-usapan na kabilang si Bersamin sa “irere-reset” ng Pangulo matapos ang courtesy resignation ng buong gabinete nitong Mayo 2025, bahagi ng tinawag niyang “bold reset” matapos mabigo ang karamihan sa kanyang Senate slate sa halalan.
Ang major shake-up na ito ay nangyari habang umiinit ang mga imbestigasyon sa flood control anomaly at iba pang alegasyon ng korapsiyon na nagdulot ng paghina ng ekonomiya sa nakaraang quarter.
Si Bersamin ay idinawit ni dating DPWH undersecretary Roberto Bernardo, na nagsabing may “15% agreed commitment” umano para sa Office of the Executive Secretary mula sa anomalous flood control projects — alegasyong mariin nang itinanggi ni Bersamin.
Sa hiwalay na isyu, inakusahan kamakailan ni Zaldy Co — dating House appropriations chair at kilalang kaalyado ni Marcos — ang Pangulo mismo na nag-utos umano ng P100 bilyong project insertions habang pinagpapantay ng Senado at Kamara ang 2025 budget.
Ayon sa kanya, si Pangandaman ang tumawag sa kanya tungkol sa umano’y direktiba ng Pangulo, at kinumpirma raw ito ni Adrian Bersamin, kamag-anak ni Lucas Bersamin at opisyal noon sa Office of the Executive Secretary.
Habang papalalim ang imbestigasyon at patuloy ang pagbubunyag ng mga alegasyon, inilalagay ng magkasunod na resignations sina Bersamin at Pangandaman sa sentro ng political upheaval sa Marcos administration at pinangangalipin ang mas malawak na epekto nito sa kampanya kontra korapsiyon na siya mismo ang nagdeklara sa kanyang SONA.
About the Author
