Nagpirmahan ng Memorandum of Understanding (MOU) noong Oktubre 21 ang Social Security System (SSS) at Department of Information and Communications Technology (DICT) upang palawakin ang social security protection para sa tinatayang 1.5 milyong freelancers at virtual assistants sa bansa.
Pinangunahan nina SSS President at Chief Executive Officer Victor Alfonso A. Limlingan at DICT Secretary Robert Joseph M. de Claro ang naturang signing ceremony sa tanggapan ng DICT sa Quezon City.
Ayon kay Limlingan, layunin ng strategic partnership na ito na patatagin ang online freelancing industry sa pamamagitan ng capability-building, competency development, at pagpapalawak ng SSS coverage para sa mga Pilipinong freelancers.
“A key objective of the MOU is to increase awareness, registration, membership and compliance with Republic Act No. 11199, or the Social Security Act of 2018, among freelancers and online workers, ensuring broader access to social security protection,” pahayag ni Limlingan.
Binigyang-diin ng SSS chief ang kahalagahan ng pagbibigay-proteksyon sa mga freelancers at virtual assistants na may mahalagang papel sa lumalagong digital economy ng bansa.
“Freelancers and virtual assistants are an important and growing segment of our workforce. By bringing them into the SSS coverage, we ensure that they, too, can access the same protection and benefits enjoyed by other workers—whether in times of sickness, maternity, disability, retirement, or even death,” dagdag pa niya.
Aniya, ang tambalang ito ay patunay ng commitment ng SSS na walang manggagawa ang maiiwan. “Our goal is simple: no Filipino worker should be left without social security protection.”
Mga Benepisyo at Contributions
Sa ilalim ng partnership, hihimukin ang mga freelancers at virtual assistants na magrehistro bilang self-employed SSS members. Sa pamamagitan nito, magiging qualified sila sa mga benepisyo tulad ng sickness, maternity, disability, retirement, funeral, at death benefits.
Bilang self-employed members, maaari din silang mag-apply sa iba’t ibang SSS loan programs gaya ng salary loans, Emergency Loan Program, at SSS Micro Loan Program. May karagdagang proteksyon din sila sa ilalim ng Employees’ Compensation (EC) Program para sa mga work-related na pagkakasakit, aksidente, o pagpanaw.
Kasalukuyang nasa 15% ang SSS contribution rate, kung saan ang Monthly Salary Credit (MSC) para sa self-employed members ay naglalaro mula PHP5,000 hanggang PHP35,000.
Paliwanag ni Limlingan, ang pinakamababang buwanang hulog ay PHP760 (PHP750 para sa regular SSS contribution at PHP10 para sa EC contribution). Samantala, ang pinakamataas naman na monthly contribution ay PHP5,280 (PHP3,000 para sa regular SSS contribution, PHP30 para sa EC, at PHP2,250 para sa Mandatory Provident Fund).
Bukod sa SSS coverage, magtutulungan din ang SSS at DICT sa mga inisyatibo ukol sa freelancer education, job creation at matching, advocacy activities, at pagmo-monitor sa outcomes ng programa para sa patuloy na pag-unlad ng freelancing ecosystem sa bansa.
About the Author
