Inatasan ni Pangulong Ferdinand “Bongbong” Marcos Jr. ang mga ahensya ng pamahalaan na pabilisin ang paglalabas ng mga proyekto at insentibo na magsisilbing “powerful draw” o pang-akit sa mga malalaking semiconductor at Artificial Intelligence (AI) companies na mamuhunan sa Pilipinas.
Ayon kay Executive Secretary Ralph Recto, itinalaga ng Pangulo bilang isang “high national priority” ang pagkuha sa mga high-impact na industriyang ito upang matiyak na makikinabang ang mga Pilipino sa mga de-kalidad na trabaho, technology transfer, at malakas na paglago ng ekonomiya.
Inihayag ni Recto ang pananaw na ito ng pamahalaan sa kanyang pagbisita sa pasilidad ng Texas Instruments sa Clark, Pampanga.
Binigyang-diin niya na layunin ng administrasyon na gawing pangunahing semiconductor at AI hub sa buong Asya ang Pilipinas sa pamamagitan ng paggamit sa talento ng mahigit tatlong milyong manggagawang Pilipino sa larangan ng teknolohiya.
Upang suportahan ang malawakang pagpapalawak ng industriya, gagamitin ng gobyerno ang Luzon Economic Corridor (LEC)—isang malaking inisyatiba sa imprastruktura katuwang ang Estados Unidos at Hapon upang mapabilis ang kalakalan mula Subic Bay, Clark, Maynila, hanggang Batangas.
Kasabay nito, binantayan din ng pamahalaan ang pag-unlad ng Pax Silica site sa New Clark City. Ang 4,000-acre na lupain na inilunsad noong Abril 2026 ang itinalagang kauna-unahang AI-native industrial acceleration hub sa bansa.
Ayon sa Bases Conversion and Development Authority (BCDA), mahigit 50 kumpanya, kabilang ang ilang trillion-dollar technology firms, ang nagpahayag na ng interes na mamuhunan sa naturang site na maglalaman ng mga semiconductor fabrication facilities at hyperscale data centers.
Sa pamamagitan ng mga hakbang na ito, target ng semiconductor at electronics industry advisory council na mapataas ang halaga ng electronics exports ng Pilipinas tungo sa $110 bilyon pagdating ng taong 2030. Gumulong ang diskusyon sa presensya nina Finance Secretary Frederick Go, BCDA President Joshua Bingcang, at DTI Undersecretary Ceferino Rodolfo.
About the Author
