Bagsak sa kulungan ang isang lalaki matapos arestuhin ng National Bureau of Investigation (NBI) nang magpanggap na alam niya ang kinaroroonan ng nagtatagong si Senator Ronald “Bato” dela Rosa upang makapang-scam ng pera sa mga matataas na opisyal ng gobyerno.
Ang suspek, na hindi muna pinangalanan ng mga awtoridad, ay nalamang may umiiral na warrant of arrest para sa kasong estafa sa Isabela.
Ayon sa ulat, unang nakipag-ugnayan ang suspek kay Executive Secretary Ralph Recto upang mag-alok ng impormasyon ukol sa kinaroroonan ng senador. Agad naman siyang itinuro ni Recto kay NBI Director Melvin Matibag.
Magugunitang isa ang NBI sa mga ahensya ng pamahalaan na kasalukuyang naghahanap kay Dela Rosa kaugnay ng mga kinakaharap nitong kasong crimes against humanity sa International Criminal Court (ICC).
Sa isang briefing nitong Biyernes, inihayag ni NBI Director Matibag na naging katanggap-tanggap ang kuwento ng suspek sa kanilang unang pag-uusap dahil nagpanggap ito bilang isang amang nagmamalasakit sa kanyang may sakit na anak. Nagpakilala rin ang lalaki na nagtatrabaho umano kay dating Governor Chavit Singson.
Dahil sa paunang tiwala, nagpadala si Matibag ng $P10,000$ upang makatulong sa gastusing medikal ng anak ng suspek. Gayunpaman, agad na nag-alerto ang NBI chief nang makatunog na modus lamang ito para makapang-ganso ng mga opisyal ng pamahalaan.
“Matapos kong ipadala ang pera, humihingi na siya ng mas malalaking halaga. Sinubukan ko siyang i-set up para makipagkita sa akin, pero mukhang napansin niya ito kaya bigla siyang nawala,” ani Matibag.
BASAHIN: BATO, PINAPAHUBARAN NG ARMAS NG PNP
Hindi naman naging hadlang ang pagtatago ng suspek dahil agad siyang natunton ng mga ahente ng NBI-Organized and Transnational Crimes Division. Noong Mayo 19, sinalakay ng mga ahente ang condominium unit nito sa Novaliches, Quezon City na nagresulta sa kanyang pagkakadakip.
Bukod sa warrant para sa estafa, lalong nabaon sa kaso ang suspek matapos makasamsam ang mga ahente ng ilang sachet ng hinihinalang shabu sa loob ng kanyang tirahan habang isinasagawa ang operasyon.
Ikinabahala rin ni Matibag kung paano nakuha ng suspek ang mga contact number ng ilang matataas na opisyal ng gobyerno, na maaari umanong gamitin ng mga kriminal upang samantalahin ang kasalukuyang sitwasyong pampulitika para mang-gantso.
Nag-iwan naman ng matalim na babala ang pinuno ng NBI para sa mga nagbabalak gumawa ng katulad na modus.
“Magsilbi itong babala sa mga taong nagbibigay ng mga pekeng impormasyon o ‘false leads’ tungkol sa kinaroroonan ni Senator Bato o ng iba pang mga nagtatago sa batas. Mag-isip-isip kayo dahil sisiguraduhin naming mananagot kayo sa batas. Aarestuhin namin kayo,” pagtatapos ni Matibag.
About the Author
