Mariing kinondena ni Dr. Jose Antonio Goitia, Chairman Emeritus ng iba’t ibang makabayang samahan, ang pinakabagong insidente ng panggigipit ng mga pwersang Tsino laban sa Philippine Coast Guard (PCG) sa West Philippine Sea (WPS).
Ayon sa ulat, noong Abril 6, hinarap ng panganib ang isang eroplano ng PCG habang nagsasagawa ng routine maritime patrol malapit sa Panganiban (Mischief) Reef at Zamora (Subi) Reef. Nagpakawala ng mga flares ang mga pwersang Tsino sa paligid ng ating sasakyang panghimpapawid—isang kilos na inilarawan ni Goitia bilang “iresponsable” at “malinaw na pananakot.”
Binigyang-diin ni Goitia na hindi ito hiwalay na insidente kundi bahagi ng isang mas malawak na pattern ng agresyon. Sa kabila ng pagiging legal ng presensya ng Pilipinas sa sarili nitong Exclusive Economic Zone (EEZ), patuloy ang nararanasang water cannon, laser incidents, at mapanganib na maniobra sa dagat. Ngayon, pati sa himpapawid ay dinadala na ang ganitong uri ng harassment.
“Ito ay malinaw na pananakot. Walang bansa na kumikilos nang ayon sa batas ang dapat ilagay sa panganib ang buhay ng kanyang mga tauhan,” ani Goitia.
Sa gitna ng mga tensyon, binigyang-puna rin ang pagpapasinaya ng bagong Coast Guard base sa Pag-asa Island. Ayon sa pahayag, ito ay isang tahimik ngunit mahalagang hakbang upang patatagin ang soberanya ng bansa nang walang halong provokasyon.
Dagdag pa ni Goitia, ang pagtatayo ng mga pasilidad at patuloy na pagpapatrolya ay patunay na hindi nagpapasindak ang Pilipinas sa mga dayuhang pwersa.
Naniniwala ang Chairman Emeritus na ang layunin ng Tsina ay subukin ang hangganan ng pasensya at tapang ng mga Pilipino. Gayunpaman, nananatiling matatag ang mensahe ng bansa: Ang West Philippine Sea ay para sa mga Pilipino.
“Ang soberanya ay hindi ipinagtatanggol sa salita lamang. Ipinapakita ito sa presensya, sa tapang, at sa paninindigan,” dagdag niya.
Si Dr. Jose Antonio Goitia ay kilalang lider ng Alyansa ng Bantay sa Kapayapaan at Demokrasya (ABKD), People’s Alliance for Democracy and Reforms (PADER), Liga Independencia Pilipinas (LIPI), at ng Filipinos Do Not Yield Movement (FDNY). Siya ay may malawak na kredensyal sa batas at edukasyon, kabilang ang pagiging Juris Doctor at Doctor of Philosophy (PhD). (MINA PADERNA)
About the Author
