Nakatakda nang gumawa ang Pilipinas ng kauna-unahang locally-made hybrid cars matapos kumpirmahin ng Mitsubishi Motors Corporation (MMC) ang plano nitong magtayo ng dedikadong hybrid electric vehicle (HEV) manufacturing line sa planta nito sa Santa Rosa, Laguna.
Sa isang pagpupulong sa Malacañang ngayong araw, Abril 6, 2026, ipinahayag ni MMC President at CEO Takao Kato kay Pangulong Ferdinand R. Marcos Jr. at Finance Secretary Frederick D. Go ang tiwala ng kumpanya sa ekonomiya ng bansa.
Tinawag ni Secretary Go ang hakbang na ito bilang isang landmark investment na magbabago sa kinabukasan ng automotive industry sa Pilipinas.
Ayon sa kanya, ang mas kapana-panabik na posibilidad ay ang potensyal ng bansa na maging exporter ng mga hybrid car sa hinaharap.
Layunin ng estratehiyang ito na pabilisin ang lokalisasyon ng advanced vehicle production, at bukod sa lokal na merkado, pinag-aaralan na rin ng Mitsubishi ang posibilidad na mag-export ng mga sasakyang gawa sa Laguna patungo sa ibang bansa sa rehiyon.
Ang lokal na produksyon ng HEVs ay inaasahang magdadala ng maraming benepisyo gaya ng pagbaba ng polusyon sa mga lungsod at bawas na pagdepende sa imported na langis.
Inaasahan din itong lilikha ng mas maraming trabaho para sa mga Pilipino habang sumusunod sa Electric Vehicle Industry Development Act (EVIDA) para sa mas mabilis na transisyon tungo sa full electrification.
Kasalukuyan namang tinatapos ng Board of Investments (BOI) ang Electric Vehicle Incentives Strategy (EVIS) program na nakatakdang i-endorso sa Fiscal Incentives Review Board (FIRB) para sa pag-apruba ng Pangulo.
Layon ng nasabing programa na lalong humatak ng mga mamumuhunan at patatagin ang posisyon ng Pilipinas bilang umuusbong na hub para sa electric vehicle manufacturing sa Southeast Asia.
About the Author
