Hindi pinagbigyan ng pamunuan ng Senado ang hiling ni Senator Ronald “Bato” Dela Rosa na manatili ang kanyang pamilya sa Senate Mansion sa Baguio City para sa isang shooting competition ngayong buwan.
Sa isang liham na may petsang Marso 12, 2026, hiniling ni Dela Rosa kay Senate President Vicente “Tito” Sotto III na payagang tumuloy ang kanyang pamilya sa nasabing mansyon mula Marso 26 hanggang 29. Gagamitin sana ito bilang matutuluyan para sa gaganaping Chief of Staff, Armed Forces of the Philippines (CSAFP) Cup 2026 Shooting Competition sa firing range ng Philippine Military Academy (PMA).
Gayunpaman, kinumpirma ni Senate Secretary Mark Llandro “Dong” Mendoza na tinanggihan ang hiling ng senador dahil sa kasalukuyang sumasailalim sa pagkukumpuni ang Senate Mansion. Ipinaliwanag din ni Mendoza na base sa polisiya, dapat na kasama ng pamilya ang mismong senador kung gagamit ng pasilidad, ngunit hindi malinaw sa liham kung dadalo si Dela Rosa.
Ang nasabing request ay umani ng batikos at katanungan dahil sa patuloy na pagliban ni Dela Rosa sa mga sesyon ng Senado mula pa noong Nobyembre 11, 2025. Ang kanyang pagtatago sa publiko ay nagsimula matapos ang mga ulat tungkol sa warrant of arrest na inisyu ng International Criminal Court (ICC) kaugnay ng imbestigasyon sa “war on drugs” ng nakaraang administrasyon.
Sa kabila ng kanyang pisikal na pagliban, nananatiling aktibo ang senador sa ilang legislative measures sa pamamagitan ng paglagda sa mga resolusyon gaya ng Senate Resolution 343. Ang nasabing resolusyon ay humihiling sa administrasyon na magsumite ng contingency plan para tugunan ang krisis sa presyo ng langis na dulot ng tensyon sa Middle East.
Sa kasalukuyan, nananatiling “out of public sight” si Dela Rosa habang patuloy na gumugulong ang mga isyung kinakaharap nito sa loob at labas ng Senado.
About the Author
