inumpirma ng Pilipinas ngayong Linggo, Enero 25, na pormal na nilang natanggap mula sa China ang 17 tripulanteng Pilipino na sinagip matapos tumaob ang kanilang cargo vessel na MV Devon Bay malapit sa Scarborough Shoal noong nakaraang linggo.
Sa isang turnover operation na isinagawa sa layong 168 nautical miles kanluran ng Tambobong, Pangasinan, inilipat ng China Coast Guard (CCG) ang mga nasagip na crew members, kabilang ang dalawang nasawi, sa BRP Teresa Magbanua ng Philippine Coast Guard (PCG). Ayon sa PCG, naging hamon ang paglilipat dahil sa malalaking alon sa lugar kaya ginamitan ito ng mga rigid-hull inflatable boats.
Nagpaabot naman ng pasasalamat si PCG spokesperson Capt. Noemie Cayabyab sa CCG para sa ipinakitang tulong humanitarya at kooperasyon upang matiyak ang kaligtasan ng mga tripulante sa gitna ng dagat. Inaasahang darating ang BRP Teresa Magbanua sa Maynila sa madaling araw ng Lunes, Enero 26, habang ang labi ng dalawang nasawi ay isasailalim sa tamang disposisyon sa pakikipagtulungan sa kanilang mga pamilya.
Sa kabila ng turnover, patuloy pa rin ang search and rescue operations ng BRP Cape San Agustin at PCG Islander aircraft para sa apat pang nawawalang mandaragat. Sinabi rin ng Chinese Embassy na magpapatuloy ang kanilang mga puwersa sa paghahanap sa mga naturang crew members.
Matatandaang tumaob ang Singaporean-flagged vessel na MV Devon Bay, na kargado ng iron ore at patungo sanang Yangjiang, China, noong madaling araw ng Biyernes, Enero 23. Ang huling lokasyon ng barko bago ito lumubog ay nasa loob ng Exclusive Economic Zone (EEZ) ng Pilipinas, partikular na sa layong 141 nautical miles kanluran ng Agno Bay, Pangasinan.
Bagama’t nananatili ang tensyong diplomatiko sa pagitan ng Maynila at Beijing dahil sa agawan ng teritoryo sa West Philippine Sea, ang naging operasyon sa MV Devon Bay ay itinuturing na isang mahalagang humanitarian mission sa ilalim ng international maritime laws.
About the Author
