Tahasang inakusahan ni Senate President Pro Tempore Panfilo “Ping” Lacson si dating Public Works Secretary Manuel Bonoan ng sadyang pagbibigay ng maling impormasyon sa Malacañang upang lituhin ang imbestigasyon sa bilyon-bilyong pisong anomalya sa mga flood control projects sa bansa.
Sa isang media briefing nitong Miyerkules, ibinunyag ni Lacson, na siyang pinuno ng Senate Blue Ribbon Committee, na ang mga maling grid coordinates na isinumite ni Bonoan ay nagresulta sa paglobo ng bilang ng mga itinuturing na “ghost projects.”
Ayon kay Lacson, nang pumunta ang mga composite team mula sa AFP, PNP, at Department of Economy, Planning and Development (DEPDev) sa mga itinalagang site gamit ang coordinates mula kay Bonoan, wala silang natagpuang proyekto. Dahil dito, agad itong naiulat bilang “ghost projects.”
“Sadyang iniligaw niya (Bonoan) ang Malacañang dahil maling coordinates ang isinumite niya,” ani Lacson sa wikang Filipino. “Dahil dito, lumabas na mas marami ang ghost projects kaysa sa totoong bilang. Dapat ay mas mababa ang bilang na ito.”
Kasalukuyan nang sinusuri ng DPWH ang kanilang Multi-Year Planning and Scheduling system at Project and Contract Management Application upang maituwid ang listahan. Si Bonoan ay nasa Estados Unidos pa rin simula noong Nobyembre 2025 at hindi pa bumabalik sa kabila ng pangakong uuwi noong Disyembre 17.
Bukod sa isyu ng coordinates, inanunsyo rin ni Lacson na sisiyasatin ng panel sa muling pagbubukas ng hearing sa Lunes, Enero 19, ang umano’y ugnayan nina dating House Speaker Martin Romualdez at ng mag-asawang Discaya—ang mga kontrobersyal na contractor sa likod ng malalaking proyekto.
Ito ay matapos makatanggap ng ulat na ginamit umano ni Romualdez ang mga Discaya bilang “front” sa pagbili ng isang mamahaling bahay sa isang posh subdivision sa Makati City. Ayon kay Lacson, may mga testigo, kabilang ang isang kasambahay, na nakakilala sa mga Discaya bilang mga taong bumili ng nasabing ari-arian.
Mariin naman itong itinatanggi ni Romualdez sa pamamagitan ng kanyang abogado na si Ade Fajardo, na nagsabing “baseless” o walang basehan ang mga paratang at hindi kailanman nakilala o nakatransaksyon ng dating Speaker ang mga Discaya.
Inatasan din ng Senado ang DPWH na ilabas ang orihinal na “Cabral files”—mga dokumento mula sa yumaong si DPWH Undersecretary Cathy Cabral na umano’y naglalaman ng listahan ng budget allocations para sa mga congressional district mula 2023 hanggang 2025.
Ang mga file na ito ay unang isiniwalat ni Batangas Rep. Leandro Leviste noong Disyembre.
About the Author
