BADYET NG DEPED, PUMALO SA P1-TRILYON -

Sa pormal na paglagda ni Pangulong Ferdinand R. Marcos Jr. sa 2026 National Budget ngayong Lunes, Enero 5, 2026, opisyal na nakamit ng Pilipinas ang makasaysayang UNESCO benchmark para sa pagpopondo sa edukasyon.

Binigyang-diin ng Pangulo na ang pondong ito ang magsisilbing pundasyon para sa tuloy-tuloy na reporma hindi lamang sa pagtuturo kundi pati na rin sa kalusugan, seguridad sa pagkain, at paglikha ng trabaho sa bansa. Bahagi ito ng kabuuang P6.79 trilyong pambansang badyet na nilagdaan sa Malacañang na naglalayong paunlarin ang kalidad ng buhay ng bawat Pilipino.

Dahil sa record-breaking na alokasyon na nagkakahalaga ng P1.015 trilyon para sa Department of Education (DepEd) at mga kaakibat na ahensya nito, tiniyak ni Secretary Sonny Angara na mapupunta ang pondo sa mga programang direktang makikinabang ang mga guro at mag-aaral.

Kabilang dito ang pagtatayo ng mga bagong pasilidad, pagbili ng mga makabagong kagamitan, at pagpapalakas sa kapasidad ng mga tagapagturo. Ayon kay Angara, nakatuon ang ahensya sa pagsisiguro na mas mapapaunlad ang kalidad ng edukasyon sa pamamagitan ng sapat na pasilidad at mas malawak na akses sa mga digital tools.

Sa ilalim ng Five-Point Reform Agenda ng DepEd, gagamitin ang halagang P85.3 bilyon para tugunan ang backlog sa mga silid-aralan kung saan mahigit 24,000 bagong classrooms ang itatayo habang bilyun-bilyon din ang ilalaan sa pagkukumpuni ng mga lumang gusali.

Upang mapabilis ang implementasyon, aktibong makikipagtulungan ang DepEd sa mga lokal na pamahalaan at pribadong sektor sa pamamagitan ng Public-Private Partnerships.

Bukod sa imprastraktura, binigyan din ng malaking pondo ang produksyon ng mga aklat at ang computerization program upang masigurong may internet connectivity at kagamitang teknolohikal ang mga pampublikong paaralan sa buong bansa.

Kasabay ng modernisasyon, bibigyang-prayoridad din ang pagdaragdag ng mga kawani upang mapagaan ang trabaho ng mga guro.

Maglalaan ang DepEd ng mahigit P42 bilyon para sa pagkuha ng halos 33,000 bagong guro, 6,000 punong-guro, at 10,000 school counselor associates. May pondo rin para sa pag-hire ng mga administrative officers at project development officers na siyang hahawak sa mga papeles sa eskwelahan upang makatutok ang mga guro sa aktwal na pagtuturo sa loob ng silid-aralan.

Hindi rin kinaligtaan ang kapakanan at nutrisyon ng mga bata sa pamamagitan ng P25.6 bilyong pondo para sa Expanded School-Based Feeding Program.

Target nitong makinabang ang 4.6 milyong mag-aaral mula Kindergarten hanggang Grade 6, gayundin ang mga estudyanteng buntis na nangangailangan ng suportang nutrisyonal.

Sa pagtatapos ng pahayag, nagpasalamat si Sec. Angara kay Pangulong Marcos sa patuloy na suporta nito na magreresulta sa isang mas maunlad at epektibong sektor ng edukasyon para sa taong 2026. (Arnold Pajaron Jr)