Halos 200 silid-aralan ang tuluyang nawasak matapos yanigin ng malakas na magnitude 7.8 na lindol ang Mindanao, ayon sa ulat ng Department of Education (DepEd) nitong Martes, Hunyo 9.
Dahil dito, agad naglaan ang kagawaran ng milyun-milyong piso para sa pagkukumpuni ng mga paaralan at pagpapatayo ng mga pansamantalang klasrum upang hindi tuluyang maputol ang pag-aaral ng mga estudyante.
Niyanig ng lindol ang baybayin ng Sarangani dakong 7:37 ng umaga noong Lunes, Hunyo 8—mismong sa pagbubukas ng bagong taon ng panuruan—na naging dahilan ng pagkaantala ng mga klase sa malaking bahagi ng katimugang Pilipinas.
Ayon sa DepEd, umabot sa 267 pampublikong paaralan sa 14 na lalawigan sa buong Soccsksargen, Zamboanga Peninsula, Northern Mindanao, Davao Region, at Caraga ang naapektuhan ng kalamidad, kung saan ang Sultan Kudarat at South Cotabato ang nakapagtala ng pinakamaraming apektadong eskwelahan. Sa paunang pagsusuri, nasa 1,391 silid-aralan ang nagtamo ng pinsala.
Sa kabuuang bilang na ito, 199 ang ganap na nawasak, 296 ang nakaranas ng malubhang pinsala, at 896 naman ang nagtamo ng bahagyang pinsala.
BASAHIN: Bagong mayorya sa Senado, magdo-donate ng isang buwang sahod para sa biktima ng lindol
Upang agad na matugunan ang krisis, nag-utos si Education Secretary Sonny Angara ng mabilisang paglalabas ng pondo para sa emergency response.
Kabilang dito ang 235 milyong piso para sa pagtatayo ng 130 “learning continuity spaces” o pansamantalang klasrum na kumpleto sa kagamitan, emergency power, at Starlink Wi-Fi connectivity. Naglaan din ng 43.9 milyong piso para sa pagkukumpuni ng mga silid-aralan na may bahagyang pinsala, at 7.7 milyong piso para sa cleanup at clearing operations. Bukod dito, plano rin ng DepEd na gamitin ang kanilang 3-billion pesos Quick Response Fund para sa rekonstruksyon at pagpapalit ng mga naguhong gusali.
Umabot sa apat na milyong mag-aaral ang naapektuhan matapos iutos ng DepEd ang suspensyon ng klase sa 8,208 paaralan noong Lunes, at nitong Martes ay nasa 818 paaralan pa lamang ang nakabalik sa in-person classes.
Gagamitin naman ng DepEd ang kanilang bagong rebisadong alituntunin sa learning continuity sa panahon ng emergency na inilabas lang noong Hunyo 4. Matapos ang “Level 4-Hinto” o full class suspension, magpapatupad na ang ahensya ng “Level 3-Hinga” sa mga malubhang naapektuhang lugar.
Sa ilalim ng Level 3, babawasan ang akademikong demand sa mga bata kung saan gagamit ang mga guro ng check-in guides, habang bibigyan ang mga magulang ng family kits para sa home-based support gamit ang mga pinasimpleng learning packets. May nakalaan namang 258.98 milyong piso para sa pag-imprenta at paghahatid ng mga materyales na ito.
Binigyang-diin ng DepEd na ang ligtas na pagbabalik sa face-to-face classes ay mahigpit na pagpapasyahan sa bawat paaralan, at papayagan lamang ang pagbabalik-eskwela kapag opisyal nang nainspeksyon at idineklarang ligtas ng mga DepEd engineer, local coordinator, at mga structural expert.
Nagpadala na rin ang kagawaran ng mga registered guidance counselor upang magbigay ng Psychological First Aid at mental health screening sa mga mag-aaral at gurong nakaranas ng trauma dahil sa kalamidad.
About the Author
