\ Rehas ang bagsak ng dalawang lalaki matapos silang arestuhin sa panloloob sa isang bahay sa Barangay 168 kung saan tinangay ang mga gamit na nagkakahalaga ng halos PHP 150,000.
Sa eksklusibong ulat ni Bea Pinlac sa “24 Oras” nitong Linggo, huling-huli sa CCTV ang pagpasok ng isang tricycle sa subdivision noong gabi ng Huwebes, Enero 22. Ayon kay P/Capt. Ryan Sangalang, commander ng Caloocan Police Station 9, nagsilbing lookout ang driver habang pinasok ng kanyang kasama ang bahay na wala ngang tao noong oras na iyon. Sinira ng mga suspek ang pinto ng garahe upang makapasok sa loob.
Paglalarawan ng mga awtoridad, “totally ransacked” ang loob ng bahay kung saan maging ang mga kuwarto ay binuksan at pinag-aksayahan ng mga gamit. Ayon sa biktima, kabilang sa mga nawala ay ang kanyang mga mahahalagang souvenirs mula sa mga biyahe sa ibang bansa. Bukod sa materyal na bagay, labis na takot din ang nararamdaman ng may-ari dahil sa paglabag sa kanilang privacy at pangambang muling bumalik ang mga kawatan.
Nakita rin ng mga kapitbahay ang mga suspek na may bitbit na dalawang sako palabas ng bahay bago mabilis na tumakas.
Natunton ng pulisya ang ginamit na tricycle sa Phase 5, Bagong Silang, kung saan umamin ang driver at itinuro ang kanyang kasama.
Naaresto ang dalawa kinabukasan, ngunit tanging kalan at tangke ng LPG na lamang ang narekober matapos maibenta na ang ibang gamit sa isang junk shop.
Ayon sa mga suspek, nagawa nila ang krimen dahil sa gutom at pangangailangan ng pera para sa pagkain.
Gayunpaman, nang kapkapan ang mga suspek, nakuhanan ang bawat isa sa kanila ng tig-isang gramo ng hinihinalang shabu.
Nahaharap na ngayon ang dalawa sa mga kasong Robbery at paglabag sa Comprehensive Dangerous Drugs Act. Posible ring sampahan ng kasong violation ng Anti-Fencing Law ang mga tauhan ng junk shop na bumili sa mga ninakaw na gamit.
About the Author
