Mariing binatikos ni Pangalawang Pangulo Sara Duterte ang inihaing impeachment complaint ng grupong Akbayan, na tinawag niyang isang uri ng harassment at “fishing expedition” na walang kalakip na ebidensya.
Sa isang opisyal na pahayag, binigyang-diin ng Bise Presidente na ang naturang hakbang ay bahagi lamang ng mas malawak na planong pulitikal laban sa kanya simula nang lisanin niya ang Gabinete ni Pangulong Ferdinand Marcos Jr.
Ayon kay Duterte, ang reklamo ay walang basehan at hindi na bago sa kanyang pandinig. Iginiit niya na ang mga imbestigasyon sa Kamara noong 19th Congress, kabilang ang kontrobersyal na isyu ng “Mary Grace Piattos” at paggamit ng confidential funds, ay ginamit lamang upang maghanap ng butas para sa impeachment.
“Paulit-ulit nilang ibinabandera ang isyung ‘Mary Grace Piattos’ bilang umano’y bahid ng katiwalian, kahit na sa kabila ng lahat ng imbestigasyon ay wala silang naipakitang kahit isang direktang paglabag,” ani Duterte.
Ibinunyag din ng Pangalawang Pangulo ang umano’y “bentahan ng mga pirma” at pangako ng mga “for later release projects” sa ilang miyembro ng Kamara kapalit ng pagtulak sa impeachment laban sa kanya. Ayon sa kanya, mismong mga mambabatas na ang umamin sa mga ganitong transaksyon sa kanilang mga nakaraang pahayag.
Kinuwestiyon ni Duterte ang kredibilidad ng grupong Akbayan, na aniya ay may malinaw na pansariling interes. Tinukoy niya ang pahayag ni Senadora Risa Hontiveros noong Agosto 2024 bilang patunay na ang tunay na layunin ng grupo ay pigilan ang anumang “Duterte comeback” sa kapangyarihan.
“Hindi malinaw kung ano ang ipinaglalaban nila para sa kaayusan ng bayan, pero napakalinaw ng kanilang pamumulitika at pagpapahirap sa usaping diplomasya ng ating bansa,” dagdag ng Bise Presidente.
Sa huli, nagbabala si Duterte na ang paggamit sa impeachment bilang sandata ng pulitika sa halip na para sa hustisya ay magdudulot ng pinsala sa sambayanang Pilipino. Nanindigan siya na ang kanyang laban ay para sa katotohanan at dangal ng bansa laban sa pang-aabuso sa kapangyarihan.
About the Author
