Isang mahalagang bahagi ng kasaysayang pampanitikan ng bansa ang nahaharap sa tahimik ngunit matinding pagbabago. Ang Solidaridad Bookshop, itinatag ng yumaong Pambansang Alagad ng Sining sa Panitikan Francisco Sionil Jose noong 1965, ay ipinagbibili na sa halagang ₱38 milyon.
Ang bookstore na matatagpuan sa Ermita, Maynila, ay kilala bilang kanlungan ng mga mambabasa, manunulat, at intelektwal—isang lugar kung saan ang bawat aklat ay may saysay, at bawat sulok ay puno ng alaala. Ngunit higit pa rito, ang Solidaridad ay naging simbolo ng paninindigan sa kultura at kaalaman, na ngayon ay nahaharap sa posibleng pagtatapos ng isang yugto.
Hindi tulad ng mga modernong tindahan na sumasabay sa uso, ang Solidaridad ay nanatiling tapat sa prinsipyo ng maingat at makabuluhang pagpili ng mga aklat. Mayroong higit sa 3,000 Filipiniana titles, at mga koleksyon mula sa iba’t ibang bansa—mula Japan, China, hanggang Gitnang Silangan.
Ayon kay Tonet Jose, anak ni F. Sionil Jose at kasalukuyang tagapamahala ng bookstore, ang gusali ay higit pa sa tindahan—ito ay bahagi ng kanilang kasaysayan. Dito ginaganap noon ang mga talakayan kasama ang mga personalidad gaya nina Fidel Ramos at Ninoy Aquino. Sa ikatlong palapag matatagpuan ang opisina at silid ni Jose—payak ngunit siksik sa alaala.
“Ito ang lugar kung saan nagsusulat ang aking ama. Nandito ang kanyang lamesa, kama, at mga larawan ng pamilya,” ani Tonet.
Isa pang misteryong bahagi ng bookstore ay si “Esperanza,” isang umano’y espiritu na ayon kay F. Sionil ay gumigising sa kanya tuwing madaling-araw upang siya ay makapagsulat. “Siya ang kasama ng tatay ko sa paglikha,” biro ni Tonet.
Ibinunyag ni Tonet na matagal nang hindi kumikita ang bookstore. “May mga araw na hindi sapat ang kita para pambayad ng kuryente,” aniya. “Kung hindi namin pagmamay-ari ang gusali, matagal na itong nagsara.”
Mag-isa na lang daw niyang pinatatakbo ang tindahan, at napagpasyahan ng pamilya na ibenta na ito—ngunit may kondisyon: dapat ipagpatuloy ng bagong may-ari ang negosyo nang kahit ilang taon, at panatilihin ang mga kasalukuyang empleyado sa loob ng isang taon.
Balak nilang maisara ang bentahan bago mag-Nobyembre ngayong taon.
