Mabilis na nakabawi mula sa kabiguan ang pambato ng Pilipinas na si Alex Eala matapos nilang makuha, kasama ang Indonesian partner na si Janice Tjen, ang isang sorpresang upuan sa semifinals ng WTA 500 Mubadala Abu Dhabi Open women’s doubles.
Binansagang “SEAsters,” pinatalsik nina Eala at Tjen ang second seeds na sina Cristina Bucsa ng Spain (World No. 22) at Zhang Shuai ng China (World No. 7) sa loob ng dalawang sets, 6-3, 6-3, nitong Biyernes ng madaling araw (oras sa Maynila).
Isang matamis na paghihiganti ang naging resulta para kay Eala, na bumalik sa court wala pang isang oras matapos siyang mabigo sa kanyang singles campaign laban kay Ekaterina Alexandrova. Sa kabila ng pagod, hindi nagpakita ng panghihina ang Pinay at agad na nakipagsabayan sa mas matatandang kalaban.
Bagama’t mas mababa ang kanilang rankings—No. 136 si Eala at No. 68 naman si Tjen sa doubles—naging dominante ang dalawa mula simula hanggang dulo.
Sa unang set, agad na kinuha ng SEAsters ang kontrol nang rumesponde sila ng 3-0 na kalamangan. Bagama’t sinubukan nina Bucsa at Zhang na dumikit sa 3-2, nanatiling kalmado sina Eala at Tjen hanggang sa makuha ang unang set.
Ganoon din ang naging daloy ng ikalawang set kung saan muling lumayo ang dalawa sa 3-0. Sa kabila ng pagtatangka ng beteranong pares na habulin ang iskor, mabilis na nag-reassert ng kontrol ang SEAsters sa 5-2 bago tuluyang isara ang laban sa loob lamang ng mahigit isang oras.
Dahil sa makasaysayang panalong ito, itinakda ng SEAsters ang kanilang pagharap sa semifinals laban sa fourth seeds na sina Tereza Mihalikova ng Slovakia at Olivia Nicholls ng Great Britain.
Ito ang unang pagkakataon na magkapareha ang dalawa sa kanilang professional careers, at ang kanilang breakthrough run ay nagbibigay ng malaking pag-asa para sa isang titulong pang-rehiyon sa pandaigdigang entablado ng tennis. (Ron Tolentino)
About the Author
