Pormal nang itinakda sa Hulyo 6, 2026 ang pagsisimula ng makasaysayang impeachment trial laban kay Vice President Sara Duterte sa Senado.
Kinumpirma ito nina Minority Senators Vicente “Tito” Sotto III at Erwin Tulfo nitong Huwebes, Mayo 21, kasunod ng isinagawang caucus ng mga mambabatas na pinangunahan ni Senate President Alan Peter Cayetano.
Ayon kay Sotto, magsisimula ang pagtitipon ng Senado bilang isang Impeachment Court tuwing alas-2:00 ng hapon mula Lunes hanggang Miyerkules, habang ang araw ng Huwebes naman ay ilalaan para sa mga pagdinig ng mga mosyon o motion days.
Sakali namang umabot pa ang paglilitis pagkatapos ng State of the Nation Address (SONA) ng Pangulo sa Hulyo 27, babaguhin ang oras nito at gagawing alas-3:00 ng hapon mula Martes hanggang Huwebes, habang ang regular na sesyon ng Senado ay gaganapin naman tuwing Lunes ng umaga at Huwebes ayon kay Tulfo.
Sa panig naman ng Kamara, inihayag ni House trial spokesperson Zia Adiong na bagama’t hindi pa pormal na natatanggap ng kaniyang tanggapan ang opisyal na abiso ukol sa iskedyul, nananatiling handa ang 11-member prosecution panel na humarap sa korte sa kahit anong petsang itakda ng Senado.
BASAHIN: ARESTO VS PUGANTENG SI BATO INIUTOS NG DOJ
Una rito, nagpalabas na ng subpoena ang Senado para kay VP Duterte upang pormal na sagutin ang mga Articles of Impeachment na ipinasa ng Mababang Kapulungan.
Mayroong limang araw ang mga prosecutor mula sa Kamara upang maghain ng tugon kapag natanggap na ang sagot ng Bise Presidente, bago tuluyang magtakda ang Senado ng isang pre-trial kung saan magsusumite ng mga ebidensya ang magkabilang panig.
Matatandaang kabuuang 257 mambabatas ang bumoto upang i-impeach si Duterte dahil sa mga akusasyon ng korapsyon, tagong-yaman, at pagbabanta sa pamilya ng Pangulo, habang ang Bise Presidente naman ay patuloy na umiwas sa mga nakaraang pagdinig at kinuwestiyon ang legalidad nito sa Supreme Court.
Samantala, tinapos ni Sen. Erwin Tulfo ang mga bali-balita ukol sa planong pagpayag sa online voting para sa mga senador.
Lumabas ang panukala matapos maging malabo ang partisipasyon ni Sen. Bato dela Rosa na kasalukuyang nagtatago sa batas dahil sa ICC arrest warrant.
Sa kabila ng pagtatangka ni Sen. Rodante Marcoleta na amyendahan ang mga tuntunin ng mataas na kapulungan upang bigyang-daan ang digital attendance sa mga pambihirang pagkakataon, nanindigan si Tulfo na haharangin ito ng minorya upang mapangalagaan ang patas na obligasyon ng bawat mambabatas na pisikal na humarap sa Senado.
Suportado naman ni Lead House Prosecutor Jinky Luistro ang paninindigang ito laban sa online voting. Ayon kay Luistro, dahil ang impeachment ay isang konstitusyonal na mandato, obligasyon ng mga senator-judges na personal na sumaksi sa session hall upang masuri nang wasto ang mga ebidensya.
Samantala, sinisikap pa ring makuha ng mga mamamahayag ang opisyal na pahayag ng kampo ni VP Sara Duterte hinggil sa itinakdang iskedyul ng kaniyang paglilitis.
About the Author
