Pormal nang naihatid ng Russian shipyard na Emperium ang kauna-unahang barko sa bagong serye ng mga electric river ferry, na iniutos ng local shipowner Vodohod.
Ang bagong ferry na pinangalanang Strelna ay bahagi ng Project Moskva 2.0, isang modernisadong bersyon ng mga dating diesel-powered river vessels na karaniwang ginamit noong panahon ng Soviet Union sa mga inland waters ng Russia.
Opisyal nang nagsimula ang operasyon ng Strelna sa mga ilog ng Saint Petersburg, taglay ang sukat na 33.3 metro ang haba, 8 metro ang lapad, at 1.2 metro lamang ang draft—na nagbibigay kakayahan nitong maglayag sa mabababang tubig. Kayang magsakay ng hanggang 140 pasahero sa dalawang palapag at pinapatakbo ng dalawang 200kW azimuthing propellers na sinusuplayan ng 550kW battery pack, kaya nitong maglayag sa bilis na 6.5 knots.
May crew na 10 katao, at bilang backup, may naka-install ding diesel generator kung sakaling hindi agad makakonekta sa mga charging station ang barko.
Isa sa mga tampok ng Project Moskva 2.0 ay ang mas pinalawak na espasyo kung ihahambing sa mga naunang disenyo, kaya’t may dagdag na pasilidad tulad ng refreshment kiosk at conference room na may panoramic windows sa harapang bahagi ng barko.
Ayon sa Emperium, anim na barko ang kanilang bubuuin sa ilalim ng Project Moskva 2.0 bago sumapit ang 2026, at ang lahat ng ito ay ire-rehistro sa ilalim ng Russian Classification Society.
Ang bagong henerasyon ng electric ferries ay itinuturing na hakbang tungo sa mas malinis, tahimik, at sustainable na transportasyon sa mga ilog ng Russia, habang pinangangalagaan ang tradisyon ng pampublikong river travel sa bansa.
About the Author
