Hindi lamang seguridad ang inihatid ng mga kapulisan sa Rizal ngayong Araw ng mga Puso, kundi pati na rin ang matatamis na kanta at mga rosas matapos na personal na manguna si Rizal Provincial Director PCOL Eleazar Barber sa ginanap na aktibidad sa Sumulong Park.
Sa ilalim ng temang “Rizal PNP, Taos-Pusong Naglilingkod sa Inyo,” idinaos ang programang “Harana ni Mamang Pulis” kung saan mismong si PCOL Barber ang nagpakitang-gilas sa pag-awit upang haranahin ang mga mamamayan. Layunin ng nasabing inisyatiba na ipakita ang mas malapit, mapagmahal, at makataong ugnayan ng pulisya sa komunidad ng Rizal.
Ang parke, na pinalamutian ng mga pink, pula at puti na lobo at Valentine’s decorations, ay napuno ng musika at kilig nang magsimulang mag-abot ng mga bulaklak ang mga naka-unipormeng opisyal sa pangunguna ng kanilang Provincial Director.
Kitang-kita ang ngiti sa mukha ng mga residente, lalo na ang mga nanay at nakatatanda, nang sorpresahin sila ni PCOL Barber at ng kanyang mga tauhan.
Ayon sa pamunuan ng Rizal PNP, ang aktibidad na ito ay bahagi ng kanilang community outreach program upang burahin ang takot at sa halip ay palitan ito ng tiwala at pagmamahal sa pagitan ng “mamang pulis” at ng publiko.
Marami sa mga nagpunta sa Sumulong Park ang nagpahayag ng pasasalamat dahil sa kakaibang karanasan na maranasan ang harana mula sa mga pulis.
Ayon sa isang residente, isang malaking bagay na maramdaman na ang mga tagapagtanggol ng batas ay mayroon ding “puso” para sa sining at para sa kapakanan ng mga tao.
Ang programa ay nagtapos na may baong inspirasyon at masayang alaala para sa mga taga-Antipolo, na nagpapatunay na ang tunay na paglilingkod ay nagsisimula sa isang taos-pusong malasakit sa kapwa.
About the Author
