Tahasang ibinasura ni Senate President Pro Tempore Sherwin “Win” Gatchalian nitong Martes ang panukala ni Sen. Alan Peter Cayetano para sa isang “power-sharing arrangement” sa Senado.
Binigyang-diin ni Gatchalian na may bisa at pinal na ang pagbabago sa liderato na isinagawa ng bagong mayorya noong Hunyo 3.
“Sa sesyon noong Hunyo 3, malinaw kung sino ang nahalal bilang Senate President pro tempore at kung sino ang itinalaga bilang acting Senate President,” pahayag ni Gatchalian sa isang panayam sa dzRH.
“Kaya hindi posible ang power-sharing, dahil isang tao lang ang nahalal.”
Nagsimula ang girian sa liderato noong Hunyo 3 nang magbuo ng korum ang 12 senador sa kabila ng pagliban ng 10 iba pa, kabilang si Cayetano na noo’y Senate President. Idineklara ng bagong mayorya na bakante ang lahat ng posisyon at inihalal si Gatchalian bilang acting Senate President.
Boykot ang naging tugon ng grupo ni Cayetano sa mga sesyon noong Hunyo 1 hanggang 3, bilang ganti umano sa naunang walkout ng minorya nang tangkaing amyendahan ang mga tuntunin para sa remote voting. Giit pa rin ni Cayetano, siya ang lehitimong pinuno ng Senado.
BASAHIN: Cayetano, iginiit na siya pa rin ang lehitimong Senate President
Upang maiwasan ang magkakasalungat na utos habang may standoff, ipinanukala ni Cayetano ang isang pansamantalang administratibong kaayusan. Kabilang dito ang “dual-signatory” o magkasamang sertipikasyon sa mga tseke, kontrata, at mga gastusin ng Senado at ng impeachment court para sa paglilitis kay Bise Presidente Sara Duterte.
Ngunit tinanggihan ito ni Gatchalian at sinabing settled na ang isyu. Idiniin din niyang siya na ngayon ang presiding officer ng impeachment court na magsisimula sa Hulyo 6.
Ramdam na ang gulo sa mismong operasyon ng Senado. Nitong Martes, nagpalabas ng advisory si Cayetano gamit ang titulong “Office of the Senate President” ukol sa oras ng trabaho ng mga empleyado bago ang holiday sa Hunyo 12.
Makalipas ang ilang oras, nagpalabas naman ng kautusan si Gatchalian para sa isang remote work setup (work from home) nitong Miyerkules at Huwebes upang bigyang-daan ang security assessment sa gusali.
Sa kabila ng magkakaibang advisory, ang 12-member na grupo ni Gatchalian ang kinikilala ng Malacañang at ng Kamara.
Ibinasura rin ng Palasyo ang pahayag ni Cayetano na may dalawang Senado ngayon—ang “Senado ng Pilipinas” at ang “Senado ng Malacañang.”
“Sinabi ng Pangulo na iisa lamang ang mataas na kapulungan, at iyan ang Senado ng Pilipinas na pinamumunuan ni acting Senate President Sherwin Gatchalian,” ani Palace press officer Claire Castro.
Nanawagan din ang Malacañang sa mga senador na ayusin agad ang sigalot dahil naaantala ang mga prayoridad na batas ng administrasyon bago ang ikalimang State of the Nation Address (SONA) ni Pangulong Marcos sa Hulyo 27, lalo’t pinaplano na ang pagpapatawag ng isang special session.
About the Author
