Opisyal nang binuksan ng Department of Science and Technology (DOST) ang PROPEL Business Hub and Exhibit Center noong Marso 31, 2026, sa DOST Complex sa Taguig City.
Ang makabagong pasilidad na ito ay magsisilbing “collaborative space” na naglalayong pabilisin ang pagdadala ng mga lokal na inobasyon sa merkado at palakasin ang ekosistema ng siyensya, teknolohiya, at inobasyon sa bansa.
Layunin ng hub na pagtagpuin ang mga startup, imbentor, scientist, at research institutions upang tulay ang agwat sa pagitan ng pagtuklas ng teknolohiya at ang aktuwal na paggamit nito sa publiko.
Ayon kay Assistant Secretary Dr. Napoleon K. Juanillo Jr., ang hub ay isang plataporma upang gawing realidad ang mga posibilidad sa pamamagitan ng pagkokonekta ng mga innovator sa scientific community.
Dito, ang mga research output ay maaaring maging “market-ready solutions” dahil sa akses sa mga shared facilities, makabagong kagamitan, at teknikal na payo mula sa mga eksperto.
Binigyang-diin niya na ang kapaligirang ito ay sadyang idinisenyo upang itaguyod ang kolaborasyon at pagpapaunlad ng teknolohiya sa bansa.
Ipinaliwanag naman ni DOST Secretary Renato U. Solidum Jr. na sa pamamagitan ng inisyatibong ito, makikinabang ang mga researcher at startups sa mga programa para sa mentorship, incubation, at acceleration.
Magbubukas din ito ng pinto para sa “technology pitching” at paghahanap ng mga partner sa industriya. Tututukan ng hub ang pagpapaunlad ng mga rehiyonal na lakas sa mga prayoridad na sektor gaya ng agrikultura, marine resources, advanced manufacturing, health technologies, at renewable energy upang masigurong ang bawat rehiyon ay kabahagi ng pag-unlad.
Sinabi ng hepe ng DOST na ang pagtatatag ng hub ay sumasalamin sa determinasyon ng ahensya na lumampas sa simpleng paglalathala ng research o research publication tungo sa “full commercialization.”
Sa pagpapahigpit ng ugnayan sa pagitan ng gobyerno, akademya, industriya, at mga investor, layon ng PROPEL Business Hub na bumuo ng diretsong daloy mula sa ideya at validation patungong prototyping, produksyon, hanggang sa maging competitive ang mga produkto sa pandaigdigang merkado.
Sa paglulunsad ng PROPEL Business Hub and Exhibit Center, muling pinatunayan ng DOST ang layunin nitong tiyakin na ang mga inobasyong Pinoy ay hindi lamang mananatili sa mga istante ng laboratoryo.
Sa halip, ang mga ito ay isasalin sa mga tunay na aplikasyon na magsusulong ng inklusibong paglago ng ekonomiya at pambansang kaunlaran para sa lahat ng Pilipino.
About the Author
