Kinumpirma ng Cagayan Provincial Information Office (PIO) ang pagguho ng Piggatan Bridge sa bayan ng Alcala, na nagdulot ng pagkaantala sa daloy ng mga sasakyan at pangamba sa kaligtasan ng mga motorista.
Ayon sa PIO, agad rumesponde ang mga tauhan ng local disaster response units at mga engineer matapos ang insidente. Sa kumakalat na video sa social media, makikitang bahagyang lumubog sa tubig ang ilang bahagi ng tulay habang naipit ang mga trak sa sirang bahagi ng istruktura.
Nagpapatuloy ang imbestigasyon ng Municipal Disaster Risk Reduction and Management Office (MDRRMO) ng Alcala at ng Cagayan provincial government upang matukoy ang sanhi ng pagguho.
Ayon sa paunang impormasyon, tatlong truck ang nadamay sa pagbagsak ng tulay, habang pitong katao ang nasugatan at agad dinala sa mga pagamutan sa Alcala at Gattaran. Patuloy naman ang rescue operations para sa iba pang posibleng pasahero o motorista na nadamay sa insidente.
Pansamantalang ipinagbawal ang pagdaan ng anumang sasakyan sa tulay habang inaalam pa ng mga engineer ang lawak ng pinsala at ang katatagan ng istruktura.
Dahil sa insidente, nanawagan ang mga lokal na opisyal at residente ng mas mahigpit na inspeksyon at maintenance sa mga lumang tulay sa lalawigan.
Hinimok din nila ang Department of Public Works and Highways (DPWH) na magsagawa ng agarang pagsusuri upang maiwasan ang pag-uulit ng ganitong aksidente.
Ang video ng pagguho ng Piggatan Bridge ay nag-viral sa social media, at umani ng iba’t ibang reaksyon mula sa publiko.
Maraming netizen ang nagpahayag ng pagkabigla at nanawagan ng pananagutan mula sa mga opisyal ng imprastraktura, habang ang iba naman ay pumuri sa mabilis na tugon ng MDRRMO Alcala at ng mga emergency personnel.
Patuloy na binabantayan ng mga awtoridad ang lugar habang nagpapatuloy ang imbestigasyon.
Pinapayuhan naman ang mga motorista na gumamit ng alternatibong ruta hanggang ideklarang ligtas muli ang tulay para sa daloy ng trapiko.
About the Author
