Hindi na biro ang nangyayari sa ating mga lansangan. Ang malagim na pag-ambush kay Ceferino “Perry” Mariano sa gitna ng Timog Avenue at EDSA ay hindi lamang isang istatistika ng krimen—ito ay isang malakas na sampal sa mukha ng kapulisan sa Quezon City.
Kung ang biktima ay isang taong kilala sa media at sa mundo ng negosyo, paano pa ang ordinaryong mamamayan? Pero ang mas malaking tanong dito na dapat sagutin ni QCPD Director Brig. Gen. Randy Glenn Silvio: Kailan n’yo gigisahin ang mga tunay na utak sa likod ng gulong ito?
Lumulutang ngayon ang mga pangalang Ver Bikol at Pinong.
Ayon sa mga impormante, si Ver Bikol ang huling nakausap ng biktima bago ito tinambangan. Sa mundo ng imbestigasyon, hindi ito coincidence; ito ay isang lead. Dapat maging agresibo ang mga tauhan ni Silvio. Huwag lang basta tumingin sa CCTV footage na kumakalat sa social media. Alamin kung ano ang “last words” sa pagitan ni Perry at ni Bikol. May banta ba? May alitan? O baka naman may “transaksyong” hindi nagkasundo?
Dito tayo sa ugat ng problema—ang pera. Ang transisyon mula sa Peryahan ng Bayan patungong Small Town Lottery (STL) ay dapat sanang naglinis ng sistema. Pero ang nangyari, tila mas naging marumi pa.
Habang ang legal na STL ay nagbibigay ng 35% commission, itong tropa nina Ver Bikol at Pinong ay nag-aalok ng 50-50 na hatian. Garapalan! Sa bawat P500,000 na kubransa, halos P300,000 ang kinukurakot nina Pinong habang barya na lang ang napupunta sa legal na kaban.
Ang masaklap pa nito: Ang mga ilegal na operator na ito ang may lakas ng loob lumaban dahil wala silang binabayarang “intelihensiya” o buwis sa gobyerno, habang ang legal na STL ang nananatiling dehado.
Huwag nating hayaang maging “cold case” ang pagkamatay ni Boss Perry. Alam ng lahat na kaibigan siya ng media, mula kay Mon Tulfo hanggang sa mga beteranong reporter. Ang pagkamatay niya ay indikasyon na ang mga gambling lords ay wala nang takot sa batas.
Kung nakuhanan na ang mga mukha ng suspects, ano pa ang hinihintay? Huwag nang hayaang makatawid pa ang kubransa sa Provident Village o kung saan mang lungga.
Ang hatol ng bayan: Gen. Silvio, ipakita ninyong mas matalas ang pangil ng QCPD kaysa sa mga “riding-in-tandem” at mga gambling lords na ito. Hustisya para kay Boss Perry, ngayon na! Abangan!
About the Author
