Photo Credit: Bongbong Marcos/FB
Pormal nang nilagdaan ni Pangulong Ferdinand Marcos Jr. ngayong Lunes, Enero 5, ang P6.79 trilyong pambansang badyet para sa taong 2026. Ang General Appropriations Act (GAA) ay nakatutok sa edukasyon, kalusugan, at proteksyong panlipunan, habang mahigpit na binabantayan ang mga pondong madaling maabuso.
Dumalo sa signing ceremony sina Senate President Tito Sotto, House Speaker Bodjie Dy, at mga miyembro ng Gabinete.
Nakuha ng sektor ng Edukasyon ang pinakamalaking parte ng badyet na nagkakahalaga ng P1.345 trilyon. Gagamitin ito sa pag-upa ng halos 33,000 guro at pagtatayo ng malapit sa 25,000 silid-aralan sa buong bansa.
Umabot naman sa record-breaking na P448.1 bilyon ang inilaan sa Kalusugan para sa Universal Health Care, habang ang Agrikultura ay may P297.1 bilyon upang palakasin ang food security at modernisasyon ng mga sakahan.
Sa gitna ng mga nakaraang kontrobersya sa bansa, nagpatupad si Marcos ng “unprecedented limits” sa unprogrammed appropriations o mga standby funds. Binura ng Pangulo ang halos P92.5 bilyon na halaga ng mga unprogrammed items sa pamamagitan ng veto.
“Let me be clear: the unprogrammed appropriations are not blank checks,” diin ng Pangulo. “We will not allow them to be misused or treated as a backdoor for discretionary spending.”
Aniya, ang kasalukuyang lebel ng unprogrammed funds ang pinakamababa simula noong 2019 upang matiyak na hindi ito magagamit bilang “discretionary fund” o pondong nakadepende lamang sa pasya ng iilang opisyal.
Naglabas din ng babala si Marcos laban sa mga opisyal na susubok mag-impluwensya o mag-divert ng pondo para sa pansariling interes. Ayon sa Pangulo, narinig ng gobyerno ang pangamba ng publiko kaya mas magiging disiplinado at transparent ang paggamit ng pera ng bayan.
Matatandaang naging “re-enacted” ang 2025 budget hanggang noong Enero 4 bago tuluyang napagtibay ang bagong pondo ngayong araw. Tiniyak ng Department of Budget and Management (DBM) na magiging maayos ang transisyon ng mga gastusin para sa tuloy-tuloy na serbisyo publiko. (Boyet Barba Jr)
About the Author
