Matagumpay na tinapos ng pambato ng Pilipinas na si Miguel Tabuena ang kanyang debut sa LIV Golf League matapos magrehistro ng kanyang pinakamagandang laro sa huling round ng torneo sa Riyadh Golf Club nitong Sabado.
Sa kabila ng huling minutong tawag mula kay 4Aces captain Dustin Johnson upang sumabak sa season opener ng liga, nagpakitang-gilas ang 31-anyos na Pinoy golfer nang itala niya ang three-under-par 69 sa ilalim ng mga dambuhalang ilaw ng desert course.
Tumapos si Tabuena na may kabuuang 282 strokes o 6-under-par para sa buong torneo, na naglagay sa kanya sa tie para sa ika-48 na puwesto sa 57 elite golfers na lumahok.
Bagama’t naging hamon ang pakikipagsabayan sa mga world-class leaders na nagpaulan ng birdies, naging makabuluhan ang debut na ito para kay Tabuena dahil sa malaking premyong naiuwi nito.
Nagbulsa ang Pinoy ace ng $50,000 o mahigit P2.9 milyon, isang halagang katumbas na ng karaniwang premyo ng isang kampeon sa Asian Tour.
Bukod sa kanyang indibidwal na kinita, makakakuha rin siya ng bahagi mula sa $900,000 na premyo ng kanyang koponang 4Aces matapos silang pumangatlo sa team standings.
Ang desisyon niyang lumaban sa Saudi Arabia kapalit ng paglaktaw sa Asian Tour opener sa Wack Wack ay nagbunga ng mahalagang karanasan at malaking dagdag sa kanyang career earnings.
Samantala, nasungkit ng kapwa debutant na si Elvis Smylie ng Australia ang kampeonato at ang nakalululang $4 milyong premyo matapos talunin sa dikit na labanan ang mga tanyag na manlalaro na sina Jon Rahm at Peter Uihlein.
Sa huli, ang matatag na pagtatapos ni Tabuena sa huling round ay nagsilbing patunay ng kanyang kakayahan na makipagpukpukan sa pinakamalalaking pangalan sa mundo ng golf, sa kabila ng pressure at “first-tournament jitters” sa isa sa pinakamayayamang liga ng palakasan sa mundo. (Ron Tolentino)
About the Author
