Iniabot ni Department of Tourism Secretary Christina Garcia Frasco ang Michelin Guide plaque kay Morning Sun Eatery owner Elizabeth Mortera sa “RestoRun–Michelin Guide Plaque Distribution” event ng DOT sa Project 4, Quezon City. Kasama rin sina QC Vice Mayor Gian Sotto at Councilor Wency Lagumbay. Ang Morning Sun Eatery sa J.P. Rizal, Project 4 ay kinilala bilang bahagi ng kauna-unahang Michelin Guide Philippines 2026. (Kuha ni ART TORRES)
Pinasinayaan ng Department of Tourism (DOT) ang Michelin Resto-Run Caravan nitong Biyernes, Disyembre 5, kung saan unang huminto ang grupo sa Morning Sun Eatery, na naghandog ng masarap at pusong Ilocano lunch para sa mga bisita.
Dumalo sa paglulunsad si Tourism Secretary Christina Garcia Frasco, kasama ang iba pang opisyal ng DOT at mga panauhin, at tinikman ang kilalang putahe ng naturang carinderia gaya ng dinakdakan, dinuguan, pork barbecue, papaitan, ensaladang talong, dinengdeng, inihaw na liempo at bulaklak, kilawing kambing, sinanglao, at iba’t ibang ihaw-ihaw.
Bago ito, pormal na tinanggap ng Morning Sun Eatery ang kanilang Michelin Bib Gourmand plaque, isang prestihiyosong pagkilala para sa mga kainan na naghahain ng de-kalidad ngunit abot-kayang pagkain.
“It is very important that we give our small businesses—our carinderias, restaurants, and cooks—the opportunity to be recognized not only globally but also by our fellow Filipinos,” pahayag ni Secretary Frasco sa panayam.
Personal din niyang binati at iniabot ang Bib Gourmand plaque sa mga may-ari ng Morning Sun, sina Lyn at Elizabeth Mortera, bilang pagkilala sa kanilang kontribusyon sa Filipino culinary excellence.
About the Author
