Pormal na ipinabatid ng Pamahalaang Lokal ng Cainta ang pagsasakatuparan ng isang malawak na esplanade project sa kahabaan ng Manggahan River.
Ang proyektong ito ay estratehikong hakbang upang mapigilan ang paglaganap ng mga informal settler habang nagbibigay ng maayos na espasyo para sa ehersisyo at pamamahinga ng mga mamamayan.
Sa panayam ng PaMaMaRiSan-Rizal Press Corps, sinabi ni Mayor Kit Nieto na ang nasabing inisyatiba ay tugon sa lumalalang problema ng illegal settlement sa mga tabing-ilog na kadalasang dumarami tuwing bumababa ang antas ng tubig sa dry season.
Sa pamamagitan ng pagtatayo ng dike at 3.5-kilometrong esplanade sa East Bank, nagkaroon ng malinaw na hangganan ang mga residential area upang hindi na ito lumawak pa patungo sa ilog.
Ang esplanade ay pinondohan nang buo ng lokal na pamahalaan (LGU-funded). Tampok sa proyektong ito ang mga jogging path, bike lanes, 5-meter easement para sa recreational activities, at pagtatanim ng Japanese bamboos at carabao grass upang mapanatili ang kaayusan ng kapaligiran.
Bahagi rin ng plano ang pagpapalawak ng proyekto sa West Bank side upang makabuo ng kabuuang pitong kilometrong pasyalan.
Nilagyan ang lugar ng mga balustre, sapat na ilaw mula dulo hanggang dulo, at mga outpost ng pulis para sa seguridad ng mga bumibisita kahit sa gabi.
Bukod sa layuning pang-seguridad, ang esplanade ay nagsisilbi na ngayong sentro ng komunidad kung saan ang mga pamilya ay maaaring mag-pitch ng mga tent, ang mga senior citizen ay may lugar para sa ehersisyo, at ang mga kabataan ay may ligtas na palaruan.
May mga plano ring maglagay ng kontroladong mga food stall o kiosk na pamamahalaan ng mga residente bilang dagdag na pangkabuhayan.
Ang konseptong ito ay hango sa mga riverbank facility sa Taiwan na naglalayong pagsamahin ang environmental protection, urban planning, at social welfare para sa mas maayos na pamumuhay sa Cainta.
About the Author
