Muling nagningning sa music scene ang singer-actress na si Jos Garcia sa kanyang emosyonal at makapangyarihang bagong single na “Iiwan Na Kita”, na nilikha ng premyadong composer na si Rey Valera sa ilalim ng Sigma 54 Music.
Ito na ang ikalawang pagkakataon na nagsanib-puwersa sina Jos at Rey, matapos ang matagumpay nilang unang kolaborasyon na “Nagpapanggap”—isang awitin na nagbigay kay Jos ng tropeo mula sa Star Awards for Music.
Hindi basta-basta ang samahan nina Jos at Rey. Malalim ang kanilang pagkakaibigan at pareho silang may pusong alay sa musika, dahilan kung bakit bumalik pa mismo si Jos mula Japan pabalik ng Pilipinas upang irekord ang kantang ito sa mismong studio ni Rey.
Ang “Iiwan Na Kita” ay sumasalamin sa masalimuot na kwento ng dalawang pusong di alam kung kailan dapat maghiwalay—isang temang malapit sa maraming nakaranas ng pag-ibig at pagkalito.
“It’s a song about a lover’s courage and the determination to hold on, even in the face of adversity,” ayon kay Jos.
Sa likod ng bawat linya ng kanta ay ang personal na paggabay ni Rey Valera, na siniguradong maramdaman ng tagapakinig ang tunay na emosyon sa bawat salitang binigkas ni Jos.
Bilang pandagdag sa damdamin ng awitin, inilabas rin ang music video na kinunan sa napakagandang tanawin ng Kyoto, Japan—ang kasalukuyang tahanan ni Jos—na nagbigay lalim at sining sa mensahe ng kanta.
Isang makabagbag-damdaming pagbabalik sa entablado, pinatunayan ni Jos Garcia na sa musika, ang tunay na damdamin ay laging bumabalik—at hindi kailanman iniiwan.
About the Author
