Naniniwala si dating Senate President Franklin Drilon na kailangan ng mas mabibigat na parusa at malawakang reporma kung seryoso ang administrasyong Marcos na puksain ang malalim na kultura ng korapsyon sa bansa.
Sa isang panayam sa ANC, hinimok ni Drilon ang Senate Blue Ribbon Committee na huwag lamang hanggang imbestigasyon ang gawin, kundi isalin ang mga natuklasan sa mga konkretong batas.
Isang pangunahing mungkahi ng dating senador ang pagpapataw ng “maximum penalty” o pinakamataas na parusa para sa mga hinalal na opisyal na mapapatunayang sangkot sa anomalya.
Ayon sa kanya, dapat maging malinaw ang polisiya na ang mga lumabag sa tiwala ng bayan ay nararapat na mas mabigat ang parusa kumpara sa mga ordinaryong kawani ng gobyerno.
Binigyang-diin din ni Drilon ang panganib ng tinatawag na “unprogrammed appropriations” sa pambansang badyet, na aniya ay madalas na pinagmumulan ng pang-aabuso.
Iminungkahi niya na ipagbawal na ang pagsasama ng mga pondong ito sa badyet dahil dito umano hinuhugot ang pondo para sa mga maanomalyang flood control projects.
Sa katunayan, nanawagan siya sa Pangulo na gamitin ang kapangyarihan nito upang pigilan ang paglalabas ng naturang pondo hangga’t walang tunay na surplus o sobrang pera sa kaban ng bayan.
Sa harap ng higit 400 proyekto sa flood control na kasalukuyang iniimbestigahan ng Department of Justice, inilarawan ni Drilon ang trabaho bilang “gargantuan” o dambuhala.
Dahil dito, iminungkahi niya na pahintulutan ang Office of the Ombudsman na kumuha ng mga pribadong abogado upang tumulong sa paghawak ng mga ganitong kalaking kaso.
Sa huli, iginiit ni Drilon ang pangangailangan para sa isang anti-political dynasty law at ang paglilinaw sa hurisdiksyon ng Ombudsman sa mga mambabatas.
Nilinaw niya na ang proteksyon ng mga senador at konggresista laban sa pagpapakulong ay dapat limitado lamang sa kanilang mga talumpati sa loob ng session hall at hindi dapat magsilbing panangga sa iba pang krimen upang hindi isipin ng publiko na ang mga mambabatas ay higit na mataas kaysa sa batas.
About the Author
