Busy ang mga manggagawa sa pag-aayos ng mga sako ng sibuyas sa loob ng Balintawak Market nitong Huwebes, Pebrero 19, 2026, sa gitna ng mga ulat tungkol sa sitwasyon ng suplay at presyo nito sa bansa.
Kasabay nito, nilinaw ng Department of Agriculture (DA) na ang kasalukuyang stock ng imported na red onion sa mga cold storage ay hindi sapat para hilahin pababa ang farmgate prices—ang presyong binibili mula sa mga magsasaka—taliwas sa mga hinaing ng ilang producer.
Ayon kay Agriculture Secretary Francisco Tiu Laurel, Jr., ipinapakita ng mga datos na ang mga imported na sibuyas ay hindi “overwhelming” sa merkado.
Sa halip, layunin lamang ng mga ito na punan ang kakulangan sa suplay o ang tinatawag na supply gap.
Nag-ugat ang pahayag ng DA matapos magreklamo ang mga magsasaka mula sa Nueva Ecija. Ayon sa kanila, tila “nagkaka-tambak” na ang mga imported na sibuyas sa mga bodega sa Central Luzon, na nagiging sanhi ng pagbagsak ng presyo ng kanilang mga ani.
Dahil dito, agad na nag-utos si Secretary Laurel ng masusing review sa lahat ng onion stocks sa bansa.
Sa ulat ng Bureau of Plant Industry noong Pebrero 13 matapos suriin ang walumpu’t dalawang porsyento ng mga pasilidad, nakapagtala sila ng imbentaryo na apat na libo, apat na raan at limampu’t apat na metric tons ng red onions na karamihan ay imported.
Base sa pagtaya ng kagawaran, ang kasalukuyang stock ng pulang sibuyas ay sapat lamang hanggang sa araw na ito ng Pebrero 19, habang ang yellow onion naman ay inaasahang magtatagal hanggang sa ika-labinlima ng Marso.
About the Author
