Isang makabuluhang Valentine’s Day ang sumalubong sa labinlimang indibidwal matapos silang opisyal na makalaya at muling makapiling ang kanilang mga mahal sa buhay sa ginanap na Culminating Activity sa Bureau of Corrections ngayong araw.
Ayon kay BuCor Director General Gregorio Pio P. Catapang Jr., ang grupong ito ay bahagi ng mas malawak na bilang na umabot sa 1,297 Persons Deprived of Liberty o PDLs na pinalaya simula noong unang araw ng Enero hanggang ngayong Pebrero 13.
Ang hakbang na ito ay nagtulak sa kabuuang bilang ng mga nakalaya sa ilalim ng administrasyon ni Pangulong Ferdinand Marcos Jr. sa mahigit 30,000 indibidwal.
Sa kabuuang bilang na 30,248 na pinalaya simula nang manungkulan ang kasalukuyang administrasyon, malaking bahagi nito ang mga nakatapos na ng kanilang sentensya habang ang iba ay nakalaya sa pamamagitan ng parole, pagkakabuwelta o acquittal sa kaso, probation, habeas corpus, at iba pang legal na proseso.
Sa kaniyang mensahe sa mga pinalaya, binigyang-diin ni Catapang na ang pangunahing layunin ng kanilang ahensya ay ang pag-reporma sa mga indibidwal upang sila ay maging responsableng bahagi ng lipunan at matagumpay na makabalik sa kani-kanilang mga pamilya.
Kasabay ng mga pagpapalayang ito, opisyal ding inilunsad ng BuCor ang Blue and Red Ribbon Project na naglalayong makipagtulungan sa pribadong sektor upang magbigay ng oportunidad sa trabaho para sa mga dating PDL.
Ipinaliwanag ni Catapang na hindi sapat ang basta lamang pagpapalaya, kundi dapat ay masigurong may sapat na kasanayan at suporta ang mga ito upang makapagsimulang muli.
Bilang bahagi ng pangmatagalang plano, itatayo rin ang isang halfway house sa mga bagong pasilidad ng BuCor upang magsilbing pansamantalang matitirhan at lunan para sa paghahasa ng mga kasanayan ng mga PDL habang sila ay nag-aadjust sa buhay sa labas ng kulungan.
Ang mga inisyatibong ito ay sumasalamin sa lumalawak na pagkilala sa kahalagahan ng rehabilitasyon sa sistemang pangkatarungan upang mabawasan ang muling paggawa ng krimen at mabigyan ng patas na pagkakataon ang lahat na magtagumpay. (MINA PADERNA)
About the Author
