Nagluluksa ang mga miyembro ng House of Representatives nitong Linggo sa pagpanaw ni Antipolo City Rep. Romeo “Romy” Acop (2nd District), na pumanaw dahil sa atake sa puso nitong Sabado. Siya ay 78 taong gulang.
Kabilang sa mga unang nagbigay-pugay si dating House Speaker Ferdinand Martin Romualdez, na inilarawan si Acop bilang isang prinsipled na lider at walang kapagurang lingkod-bayan na malaki ang naitulong sa pagpapalakas ng kongresyunal na oversight, lalo na sa kanyang papel sa House Quad Committee.
“He was firm but fair. He asked the hard questions but always within the bounds of decency and institutional respect. That kind of leadership elevated the credibility of the committee and the House itself,” pahayag ni Romualdez.
Ayon pa kay Romualdez, si Acop—isang abogado at dating police general—ay hindi kailanman naghangad ng papuri o headline, at nanatiling tapat sa paniniwalang ang public office ay isang public trust. Ipinabatid din niya ang pakikiramay sa pamilya, mga kaibigan, at mga nasasakupan ng yumao, at sinabing nag-iwan si Acop ng pamanang reporma at mataas na pamantayan sa Kongreso.
Kinumpirma naman ni Deputy Speaker Ronaldo Puno, isang malapit na kaibigan ni Acop, ang pagpanaw ng mambabatas at inilarawan siya bilang isang “dedikado, matapang, at tapat na lingkod-bayan.”
“The Congress and our country are the lesser for his loss,” ani Puno.
Samantala, sinabi ni House Speaker Faustino Dy III na ang pagpanaw ni Acop ay isang malaking kawalan hindi lamang para sa Kongreso kundi pati sa Antipolo City at sa sambayanang Pilipino.
Nagpahayag din ng pakikiramay si Manila 6th District Rep. Benny Abante, na nagsabing si Acop ay palaging pumapanig sa katarungan at hindi nakakalimot sa mga biktimang tungkulin ng Kongreso na pakinggan. Binigyang-diin niya ang tapang, linaw ng paninindigan, at moral na paniniwala ni Acop sa mga kritikal na pagdinig.
Patuloy ang pagbuhos ng pakikiramay at pagkilala mula sa mga kapwa mambabatas at opisyal ng pamahalaan sa naiambag ni Rep. Acop sa serbisyo publiko. (Arnold Pajaron Jr)
About the Author
