Sa pagdiriwang ng kanilang ika-28 anibersaryo, muling pinagtibay ng Akbayan Party ang kanilang pangako na babanggain ang tradisyunal na pulitika at gigibain ang mga nakaugat na dinastiya sa ngalan ng tunay na demokrasya.
Bitbit ang temang “Lahat Posible!”, layon ng partido na isulong ang isang tagumpay na pinatatakbo ng mamamayan at pinamumunuan ng mga lider na tunay na nagsisilbi sa sambayanan.
Mariing ipinahayag ni Akbayan President Rafaela David na sa loob ng halos tatlong dekada ay napatunayan ng partido na kayang manalo ng ordinaryong Pilipino.
Binigyang-diin niya na hindi na dapat ang mga Marcos o Duterte ang magwagi sa hinaharap, at dapat nang tuldukan ang mga dinastiya pagsapit ng 2028.
Ayon kay David, kailangan ng bansa ng isang bagong anyo ng “people power”—isang puwersa na hindi lamang nararamdaman sa kalsada kundi nanunuot hanggang sa mga korte, lokal na pamahalaan, Kongreso, at maging sa Malacañang upang baguhin ang sistema ng pamamahala.
Nakisa rin sa panawagang ito si Akbayan Representative Chel Diokno, na nagsabing walang magbabago sa bansa hangga’t napipilitan ang mga tao na pumili lamang sa pagitan ng mga kurakot at sakim. Kinilala niya ang lakas ng mga “Cheldren” na nagbigay sa kanya ng inspirasyon na ang kabutihan ay magtatagumpay laban sa kasamaan.
Dagdag pa ni Diokno, ang pagkapanalo ng Akbayan bilang numero unong party-list at ang pagpasok ng mga progresibong mambabatas sa Senado at Kongreso ay malinaw na hudyat na nagsimula na ang pagbabago.
Sa panig ng mga sektor, binigyang-diin ni Rep. Dadah Ismula ang kahalagahan ng pagkakaroon ng upuan ng mga marginalized sa Kongreso.
Mula sa kanyang pinagmulan sa Simariki hanggang sa bulwagan ng Batasan, ang kanyang panalo ay itinuturing na tagumpay ng bawat katutubong nangarap ng proteksyon sa kanilang ancestral land at dekalidad na edukasyon.
Sinuportahan din ito ni Rep. Kaka Bag-ao na nagsabing ang tunay na mga “dragon” o kalaban na dapat talunin ay ang kahirapan at kawalan ng pagkakapantay-pantay sa pag-unlad ng bansa.
Bilang pagtatapos, ipinaliwanag ni Rep. Perci Cendaña na ang Akbayan ay nananatiling partido ng mamamayan na tumatangging tanggapin ang bulok na sistema.
Aniya, kahit gaano pa kahirap ang sitwasyon, patuloy silang magpupursige na ayusin ang bansa at lumikha ng mas magandang bukas.
Ang pagdiriwang ay nagsilbing pormal na paglulunsad ng mas malawak na pagkilos laban sa mga pamilyang gahaman sa kapangyarihan patungo sa mas maliwanag na kinabukasan ng Pilipinas.
About the Author
