Ibinasura ng Supreme Court (SC) ngayong Miyerkules, Setyembre 30, ang mga petisyong nagkukuwestiyon sa naging pasya ng Senate impeachment court na baguhin ang voting threshold o kailangang bilang ng boto para sa posibleng conviction sa impeachment trial ni Vice President Sara Duterte.
Ibinasura ng Mataas na Hukuman ang mga hiwalay na petisyon na inihain nina dating Executive Secretary Victor D. Rodriguez, Berteni Cataluña Causing, at Atty. Ernesto B. Francisco, Jr. dahil sa usapin ng teknikalidad—partikular ang kawalan ng legal standing o locus standi ng mga petitioner at dahil na rin sa pagiging premature o maaga pa ng mga hidwaan.
Ayon sa SC, pinal na ibinasura ang mga reklamo batay sa unanimous na boto ng mga magkakasamang mahistrado.
Magugunitang matapos ang oral arguments noong Setyembre 23, bumoto ang Senate impeachment court na babaan ang kinakailangang threshold sa pagboto.
Bumoto ang 13 senador pabor dito, samantalang ang presiding officer na si Chiz Escudero—na unang naglabas ng pasya noong Hulyo 6 na fixed sa 16 na boto ang kailangan para makapag-convict—ang nag-iisang bumoto laban dito.
Batay sa bagong alituntunin ng Impeachment Court, ang mga senador lamang na may kakayahang makabahagi sa pagdinig sa araw ng pagboto ang isasama sa bilang.
Dahil 20 na lamang ang aktibong senador ngayon, bababa sa 14 na boto ang kailangan para hatulang guilty ang Bise Presidente, samantalang 7 boto naman ang kailangan para sa kaniyang acquittal.
Pangunahing giit ng mga petitioner, kabilang na si Rodriguez, na tila inamyendahan ng Impeachment Court ang Saligang Batas dahil malinaw na nakasaad sa Article XI, Section 3(6) ng 1987 Constitution na kinakailangan ang dalawang-katlo (two-thirds) ng boto ng “all the Members of the Senate” para makapag-convict.
Ikinatuwa ng Senate Impeachment Court ang naging desisyon ng SC at sinabing pinagtibay lamang nito na ang kanilang mga interpretasyon at proseso ay “constitutionally bulletproof.”
“By junking these challenges, the Highest Court has drawn a definitive firewall around the independence of the Senate as an impeachment court, confirming that its proceedings cannot be held hostage by premature judicial meddling or collateral litigation,” pahayag ni Senate Impeachment Court spokesperson Reginald Tongol.
Dagdag pa ni Tongol, nananatiling umiiral ang Setyembre 23 ruling ng Senado at magpapatuloy ang impeachment trial nang walang anumang humahadlang o nanggagambala mula sa labas.
Maging si Senate President Sherwin Gatchalian ay nagpaabot din ng parehong saloobin at sinabing patunay ang naging hatol ng SC na nirespeto nito ang saklaw at probisyon ng Impeachment Court sa ilalim ng Saligang Batas.
“Two petitions were filed — one was a TRO, and the other was a prayer for status quo ante order. Both were dismissed by the SC, so that means the trial will continue,” pahayag ni Gatchalian.
About the Author
