Arestado ng Parañaque City Police Station nitong Setyembre 9, 2026 ang isang 42-anyos na dating traffic enforcer matapos magpanggap na aktibong opisyal at mangikil ng protection money sa isang kumpanya ng semento sa kahabaan ng East Service Road sa Parañaque City.
Unang nagtungo ang suspek sa nasabing kumpanya sa Barangay San Martin de Porres noong Setyembre 1 at nagpakilalang enforcer ng Taguig City.
Hiningan nito ng pera ang kumpanya kapalit ng hindi panghuhuli sa kanilang mga delivery truck, ngunit tinanggihan ito ng transport supervisor.
Muling bumalik ang suspek nitong Setyembre 9 at pumasok sa opisina upang muling mang-hingi ng pera, kaya agad na tumawag ng pulis ang mga alertong empleyado.
Nang dumating ang mga awtoridad, sinubukan pang tumakas ng suspek gamit ang kanyang motorsiklo at nanlaban sa mga pulis. Nagkagirian at nagkahabulan pa sa putikan bago tuluyang napasuko at naposasan ang suspek.
Lumabas sa beripikasyon sa Taguig City Traffic Management Office na matagal nang nagwakas ang serbisyo ng suspek bilang enforcer.
Hinala ng mga imbestigador, posibleng may iba pa itong nabiktima sa mga kalapit na lungsod gamit ang parehong modus.
“Pinupuri natin ang ating mga pulis sa mabilis na pag-aresto sa suspek. Ang pagpapanggap na traffic enforcer para mang-extort ay isang pagtataksil sa tiwala ng publiko na hindi natin kailanman toleratin,” pahayag ni PBGEN Christopher N. Abrahano, OIC ng NCRPO.
Kasalukuyang nakakulong ang suspek sa Parañaque City Police Station at nahaharap sa mga kasong Attempted Robbery-Extortion, Usurpation of Authority, at Resistance and Disobedience to a Person in Authority sa ilalim ng Revised Penal Code.
About the Author
