Naglabas ng isang mahigpit na direktiba ang Malacañang upang tugunan ang paulit-ulit na pagkaantala na nagpapatagal sa pagtatapos ng LRT-1 Cavite Extension project.
Ayon kay Palace Press Officer Claire Castro, nananatili ang paninindigan ng pamahalaan na dapat maibigay sa takdang panahon ang mga mahahalagang imprastraktura upang maibsan ang matinding trapiko na pumipinsala sa Metro Manila at mga karatig-lalawigan.
Binalaan din ng pamahalaan ang mga pribadong concessionaire na pananagutin nang husto sa ilalim ng batas para sa anumang timeline slippage o pagkaantala sa kontrata.
“Ang mga pampublikong imprastraktura ay may direktang epekto sa ekonomiya at sa araw-araw na pamumuhay ng ating mga kababayan. Hindi natin papayagan ang pabaya o mabagal na pag-usad kung may sapat namang suporta mula sa gobyerno,” ayon kay Castro.
Sa kabila ng babala ng pamahalaan, lumalabas sa mga talakayan ng mga eksperto na ang pagkaantala ay hindi dahil sa kakulangan ng pondo o kawalan ng interes ng mga pribadong kontratista.
Sa halip, nahaharap ang proyekto sa mga mabibigat na hamon sa operasyon na labas sa kontrol ng mga engineer.
BASAHIN: LRT-1 extension patungong Cavite, hinarang umano ng mga Villar
Kabilang sa mga pangunahing dahilan ng pagkaantala ay ang masalimuot na proseso ng Right-of-Way (ROW) acquisitions o ang pagbili sa mga pribadong lupain at ari-arian na tatamaan ng riles.
Bukod dito, nagpapatagal din ang mga clearing operations dahil sa mahabang pakikipag-negosasyon para sa relokasyon ng mga informal settler na nakatira sa mga apektadong lugar.
Idagdag pa rito ang komplikadong utility relocations o ang paglilipat ng mga naglalakihang tubo ng tubig, kable ng kuryente, at linya ng telekomunikasyon na kasalukuyang nakabaon sa kahabaan ng itinatayong proyekto.
Habang iginiit ng pamahalaan ang mas mahigpit na pananagutan, ipinanawagan naman ng sektor ng konstruksyon ang mas mabilis na koordinasyon sa pagitan ng mga ahensya ng gobyerno at mga kompanya ng utilidad. Ito ay upang tuluyang maalis ang mga logistikal na balakid na pumipigil sa pag-usad ng LRT-1 Extension.
About the Author
