Nag-isyu ng Show Cause Order (SCO) ang Land Transportation Franchising and Regulatory Board (LTFRB), sa ilalim ng gabay ni DOTr Secretary Giovanni “Banoy” Z. Lopez, laban sa siyam na motorcycle taxi platform providers dahil sa nadiskubreng discrepancy sa bilang ng kanilang mga yunit.
Ang hakbang na ito ay nagdala sa kabuuang 30 ride-hailing companies na kasalukuyang iniimbestigahan ng ahensya dahil sa ilegal na pagtanggap o onboarding ng mga TNVS at motorcycle taxis sa kani-kanilang online platforms.
Ang nasabing anomalya ay nabunyag sa gitna ng pamamahagi ng fuel subsidy, kung saan ang listahang isinumite ng mga kumpanya ay lumabas na mas marami kumpara sa bilang ng mga yunit na awtorisado sa opisyal na database ng LTFRB.
Ayon kay LTFRB Chairman Vigor Mendoza II, kailangang magpaliwanag nang nakasulat ang mga naturang kumpanya kung bakit hindi dapat suspindihin o bawiin ang kanilang awtoridad na mag-operate.
Kabilang sa mga pangunahing paglabag na sinusuri ay ang pagtanggap ng mga rider at sasakyan na lampas sa itinakdang limitasyon o authorized cap ng board, gayundin ang kabiguang panatilihin ang mga orihinal na yunit sa kanilang platform na nagreresulta sa pag-abandona sa serbisyo sa publiko.
Binigyang-diin ni Mendoza na marami ang dapat ipaliwanag ng mga kumpanyang ito at titiyakin ng ahensya na may kaukulang parusa ang sinumang napatunayang sumuway sa mga umiiral na regulasyon.
Bagaman isinusulong ng LTFRB ang pagkakaroon ng mandatoryong access sa database ng mga ride-hailing apps para sa mas mahigpit na superbisyon, may mga legal na limitasyon na humahadlang sa kasalukuyan upang magawa ito nang lubusan.
Gayunpaman, ang naging resulta ng distribusyon ng fuel subsidy ang naglantad na hindi naging tapat ang ilang kumpanya sa tunay na bilang ng kanilang mga yunit na bumabyahe sa kalsada.
Nakatakda ang pormal na pagdinig para sa usaping ito sa darating na Mayo 15 upang dinggin ang panig ng mga kumpanyang nasangkot sa imbestigasyon.
About the Author
