Nagkaisa ang mga pinuno ng pinakamalalaking labor coalitions sa bansa ngayong Abril 28, 2026, upang ilunsad ang isang higanteng mobilisasyon para sa nalalapit na Araw ng Paggawa sa Mayo 1.
Sa isang joint press conference, pormal na nagbuklod ang mga lider mula sa Bukluran ng Manggagawang Pilipino (BMP), Kilusang Mayo Uno (KMU), Nagkaisa! Labor Coalition, at Trade Union Congress of the Philippines (TUCP).
Bitbit ang temang “Sahod Itaas! Buwis Ibaba! Mag-Welga,” layon ng pagtitipon na ipakita ang pwersa ng uring manggagawa sa gitna ng patuloy na pagtaas ng presyo ng mga bilihin at kakulangan sa sapat na kita.
Ayon sa mga grupo, ito ay isang “unified mobilization” kung saan isasantabi muna ang mga pagkakaiba sa ideolohiya upang ipanawagan ang kagyat na pagtaas ng minimum wage sa buong bansa at ang pagpapababa sa buwis na direktang bumabawas sa take-home pay ng mga empleyado.
Nagbabala ang mga lider ng mga nasabing grupo na magiging “militante at malawakan” ang kilos-protesta sa darating na Biyernes. Inaasahang libu-libong manggagawa mula sa iba’t ibang sektor ang magmamartsa sa mga lansangan upang iparating sa gobyerno ang kanilang mga hinaing hinggil sa seguridad sa trabaho at makatarungang benepisyo.
Hinimok din ng labor coalitions ang lahat ng mga manggagawa sa pribado at pampublikong sektor na makiisa sa panawagan at ipakita ang tunay na lakas ng pagkakaisa ng mga Pilipino.
About the Author
