Pormal nang ibinahagi ng ATIN ITO Coalition ang mga detalye para sa kanilang ika-apat na civilian mission sa West Philippine Sea (WPS) sa isang press briefing ngayong Abril 27, 2026.
Sa ilalim ng temang “Balik-Pag-asa,” binigyang-diin ng grupo na ang proyektong ito ay isang mahalagang hakbang upang patatagin ang “mapayapang presensya ng mga sibilyan at pagpapakita ng pakikiisa sa mga komunidad ng Pilipino” sa naturang bahagi ng teritoryo ng bansa.
Ayon sa koalisyon, ang misyon ay magtatampok ng mga kakaibang aktibidad kabilang ang isang “patriotic jetski flag ride” na susundan ng isang “island concert” at mga “humanitarian support activities” para sa mga residente ng Pag-asa Island.
Layon ng mga aktibidad na ito na maghatid ng inspirasyon at konkretong tulong sa mga mangingisda at pamilyang naninirahan sa gitna ng tensyon sa dagat.
Naniniwala ang pamunuan ng ATIN ITO na ang inisyatibong ito ay nagsisilbing “simbolo ng pag-asa at pagkakaisa ng bawat Pilipino” sa pagtatanggol sa ating karapatan at likas na yaman.
Dagdag pa nila, ang “Balik-Pag-asa” ay isang mapayapang paraan ng paggigiit ng soberanya na nagpapakita na ang bawat mamamayan ay may bahaging ginagampanan sa usapin ng pambansang teritoryo.
About the Author
