Nagbago ang ihip ng hangin sa serye matapos itakas ng Goyang Sono ang isang dikit na 69-63 comeback win laban sa defending champion na Changwon LG sa Game 1 ng Korean Basketball League (KBL) semifinals nitong Huwebes.
Hindi naging madali ang panalo para sa Skygunners matapos silang mabaon sa 36-23 sa halftime. Pinangunahan ng isa pang Pinoy import na si Carl Tamayo ang ratsada ng Sakers sa unang bahagi ng laro, kung saan naging sandigan siya sa opensiba para kontrolin ang tempo ng laban.
Gayunpaman, ibang kwento ang nasaksihan sa second half. Unti-unting tinapyas ng Goyang Sono ang kalamangan sa ikatlong kanto sa pamamagitan ng paghihigpit ng kanilang depensa. Naibaba nila ang deficit sa 54-46 bago pumasok sa huling frame.
Dito na tuluyang binaligtad ng Skygunners ang script nang limitahan nila ang Sakers sa kakarampot na siyam na puntos lamang sa buong fourth quarter. Ang kanilang mga defensive stops ay naging mitsa ng momentum-shifting plays na nagdala sa kanila sa tagumpay.
Bagama’t kinapos sa opensiba si Kevin Quiambao, nag-ambag pa rin ito ng mahahalagang numero para sa Goyang Sono sa itinalang walong puntos, limang rebounds, dalawang assists, tatlong blocks, at isang steal.
Sa kabilang banda, si Tamayo ang itinuturing na top scorer ng gabi matapos humakot ng 19 puntos para sa Changwon, ngunit hindi ito sapat nang magsimulang magmintis ang kanyang mga kakampi sa mga krusyal na sandali ng laro.
Sa resulta ng Game 1, napatunayan ng Goyang Sono na bagama’t sila ang lower seed sa seryeng ito, hindi lamang sila basta nagnakaw ng isang panalo kundi kinuha rin nila ang kontrol sa momentum ng semis. (Ron Tolentino)
About the Author
