Arestado ng Bureau of Immigration (BI) ang isa pang Chinese national na nagpanggap na Pilipino gamit ang mga pekeng dokumento.
Ayon kay BI Intelligence Division Chief Fortunato Manahan Jr., naaresto si Zhou Jianxiao, 35-anyos, noong April 10 sa Barangay Malainin, Ibaan, Batangas.
Zhou ay inaresto ng BI regional intelligence operations unit 4a, sa pakikipagtulungan sa Batangas Police Provincial Office-Ibaan Municipal Police Station, Philippine National Police Ibaan Intelligence Unit, at ng Armed Forces of the Philippines dahil sa paglabag sa Section 37(a)(7) ng Philippine Immigration Act of 1940, gaya ng sinusugan, matapos gumamit ng mga pekeng dokumento at magpanggap bilang Filipino.
Ang suspek ang gumamit diumano ng alyas Donny Flores Zhou sa kanyang Philippine Driver’s license, kung saan nakasaad na siya ay mamamayang Pilipino.
Napag-alaman na si Zhou ang nagpapatakbo ng operasyon ng isang bodega sa lugar na iyon. Ang karagdagang inspeksyon sa nasabing lugar ay humantong sa pagkakadakip ng tatlo pang Chinese nationals na kinilalang sina Li Qican, Ji Jingui, at Chen Longlong.
Sila ay inaresto rin dahil sa iba’t ibang immigration violations, kabilang ang pagiging overstaying, paglabag sa mga kondisyon ng kanilang pananatili, at pagtatrabaho nang walang kaukulang visa o permit. (PERCIVAL GILHANG)
About the Author
