Sa loob ng walong mahabang taon, tila naging mailap ang panalo para sa University of the Philippines (UP) laban sa kanilang kapitbahay sa Katipunan na Ateneo de Manila University.
Ngunit nitong Linggo, sa isang makapigil-hiningang pagtatagpo na tumagal ng dalawang oras at 44 na minuto, tuluyan nang bumasag ng kamalasan ang Fighting Maroons matapos itala ang isang “come-from-behind victory” laban sa Blue Eagles sa UAAP Season 88.
Para sa three-time Best Middle Blocker na si Nina Ytang, ang tagumpay na ito ay higit pa sa isang karaniwang panalo.
Ayon kay Ytang, bagaman may mga pagkakataong bumababa ang kanilang enerhiya sa loob ng court, naitatawid nila ito dahil sa matinding kagustuhang manalo.
Ginamit pa ni Ytang ang terminong “manifest” at biyong sinabi na panahon na upang “ilipat ang korona” sa kabilang panig ng Katipunan—isang pahayag na nagpapakita ng lumalakas na kumpiyansa ng State U.
Sa kabila ng magandang simula ng season kung saan tinalo rin nila ang University of the East (UE), nananatiling maingat ang Italian head coach ng UP na si Fabio Menta.
Inamin ni Menta na may mga kinakaharap pa ring hamon ang koponan pagdating sa physical fitness na nakaaapekto sa kanilang depensa, blocking, at atake.
Gayunpaman, binigyang-diin niya na ang kanilang pagkapanalo sa mga higanteng gaya ng La Salle at NU noong nakaraang season ay patunay na “posible ang lahat” sa bawat laro.
Nakatakdang harapin ng UP sa kanilang mga susunod na laro ang mga finalists noong nakaraang taon—ang DLSU Lady Spikers at NU Lady Bulldogs—na magsisilbing tunay na sukatan kung kaya na nga ba nilang makapasok sa Final Four. (RON TOLENTINO)
About the Author
