Binigyang-diin ng Department of Education (DepEd) ang kahalagahan ng mas malakas na ugnayan sa pagitan ng mga institusyong pang-edukasyon, training providers, industry partners, at mga ahensya ng gobyerno sa katatapos lamang na 16th ASEAN Qualifications Reference Framework Committee (AQRFC) Meeting.
Sa nasabing pagtitipon, kinatawan ng DepEd ang Pilipinas upang ipakita ang mithiing makabuo ng isang “future-ready” na workforce sa pamamagitan ng isang framework na magkakabit sa basic education, technical-vocational training, higher education, at employment.
Ayon kay Education Secretary Sonny Angara, sa ilalim ng pamumuno ni Pangulong Ferdinand Marcos Jr., layon ng bansa na humubog ng malikhain at inobatibong mga mag-aaral na magiging malaking ambag sa iba’t ibang industriya.
Ang direksyong ito ay nakapaloob sa mga updates ng Philippine Qualifications Framework (PQF) na nagbibigay ng mas malinaw na landas para sa mga mag-aaral upang matiyak na ang mga kasanayang nakuha sa paaralan ay kinikilala sa mundo ng pagtatrabaho.
Sa kasalukuyan, ang binagong PQF ay mayroon nang walong antas na naka-align sa ASEAN framework, kung saan ang Senior High School ay nasa Level 3.
Isinama na rin ang micro-credentials upang suportahan ang lifelong learning at magbigay ng mas pleksibleng oportunidad sa mga Pilipino na madagdagan ang kanilang kasanayan sa paglipas ng panahon.
Binigyang-diin din ng DepEd ang pangangailangan para sa mas mahigpit na koordinasyon sa Technical Education and Skills Development Authority (TESDA), Commission on Higher Education (CHED), at Department of Labor and Employment (DOLE).
Ang pagtutulungang ito ay naglalayong punan ang mga puwang o “gaps” sa pagitan ng natapos na edukasyon at ang aktwal na kailangan ng merkado ng paggawa.
Kasama sa mga inisyatibong ito ang pagpapalawak ng enterprise-based training at industry-led upskilling programs upang masigurong handa ang mga mag-aaral sa pagpasok sa teknikal at bokasyonal na mga programa patungo sa kanilang magiging trabaho.
Ang mga hakbang na ito ay lalong napatibay matapos ang pormal na turnover ng Final Report ng Second Congressional Commission on Education (EDCOM 2) at ng National Education and Workforce Development Plan (NatPlan) 2026–2035 kay Pangulong Marcos Jr.
Inaasahan na ang mga panukalang batas gaya ng Lifelong Learning Development Framework Act of 2025 ay magsisilbing pundasyon para sa mas maayos na sistema ng pagsasanay at trabaho.
Ayon kay Secretary Angara, bagama’t malinaw na ang roadmap o plano, ang hamon ngayon ay ang maayos na implementasyon, paglalaan ng tamang badyet, at ang pagkakaroon ng pananagutan ng bawat institusyon para sa tagumpay ng mga mag-aaral.
About the Author
