Screenshot mula sa video ng Bombo Radyo
MARIING nilinaw ni Interior Secretary Jonvic Remulla na hindi maaaring manatili sa aktibong serbisyo ng Philippine National Police (PNP) si dating PNP chief Nicolas Torre III habang nanunungkulan bilang General Manager ng Metropolitan Manila Development Authority (MMDA).
Sa isang press briefing sa Camp Crame nitong Huwebes, binigyang-diin ni Remulla na labag sa batas ang paghawak ng dalawang posisyon sa pamahalaan nang magkasabay.
Idinagdag pa ng kalihim na sakaling mapatunayang tumatanggap pa rin ng sweldo si Torre mula sa PNP habang nasa MMDA, obligado itong ibalik ang anumang kumpensasyong nakuha niya mula sa kanyang dating posisyon sa kapulisan.
Ang pahayag na ito ay kasunod ng paglalabas ng PNP Directorate for Personnel and Records Management ng General Order No. NHQ-GO-OR-2026-330 noong Enero 19, kung saan pormal na inanunsyo ang pagreretiro ni Torre sa serbisyo matapos ang pag-apruba ng National Police Commission (Napolcom).
Gayunpaman, sa isang ambush interview, itinanggi ni Torre na siya ay nagsumite ng aplikasyon para sa optional retirement o pumirma ng anumang dokumento para rito.
Ayon kay Torre, hindi ito ang unang pagkakataon na may opisyal ng pulisya na naglingkod sa ibang ahensya at plano pa niyang makipag-usap sa kanyang mga nakataas na pinuno upang linawin ang sitwasyon.
Ang kontrobersyang ito sa pagreretiro ni Torre ay nagdudulot ngayon ng problema sa kanyang kapalit na si Lt. Gen. Jose Melencio Nartatez Jr.
Dahil sa hindi pa malinaw na estado ng pagreretiro ni Torre, hindi muna maaaring makuha ni Nartatez ang apat na bituin o ang ranggong police general na karaniwang ibinibigay sa isang ganap na pinuno ng PNP.
Ang gusot na ito ay nag-ugat pa noong Agosto 26, 2025, nang matanggal si Torre sa kanyang pwesto bunsod ng hidwaan sa Napolcom kaugnay ng muling pagtatalaga ng ilang matataas na opisyal ng pulisya.
Sa kasalukuyan, nananatiling hamon para sa administrasyon ang pagresolba sa legal na katayuan ni Torre upang matiyak na nasusunod ang mga regulasyon sa serbisyo publiko.
Habang hinihintay ang pinal na desisyon at paglilinaw mula sa mga kinauukulan, nakatutok ang mata ng publiko sa kung paano maaapektuhan nito ang liderato ng pambansang kapulisan at ang operasyon ng MMDA sa ilalim ng bagong pamunuan. (ART TORRES)
About the Author
