Kinumpirma ni dating DPWH Secretary Rogelio Singson noong Huwebes na nakatanggap siya ng informal offers mula sa Malacañang upang muling pamunuan ang Department of Public Works and Highways (DPWH) bilang posibleng kapalit ni Secretary Manuel Bonoan, kasunod ng isyu sa substandard na flood control projects.
Ayon kay Singson, nakipagpulong siya kay Pangulong Ferdinand Marcos Jr. para talakayin ang administration’s Integrated Water Resources Management Program, ngunit malinaw niyang sinabi na hindi siya babalik sa gobyerno dahil hindi papayag ang kanyang asawa.
“Definitely, may feelers. Matagal na kaming magkakilala ng Presidente… hindi ako stranger sa kanya,” ani Singson. Nang tanungin kung tatanggap ba siya sa alok, biro niya: “I think that will be farfetched because my wife will leave me already if I go back to government.”
Sinabi ng Palasyo kamakailan na may tiwala pa rin si Marcos kay Bonoan, kahit na lumalabas sa ulat na malaking bahagi ng P545-bilyong flood control projects ay naipamahagi lamang sa 15 contractors. Ngunit ipinakita ng Senate investigations at on-site inspections ng Pangulo ang maraming anomalya sa pag-award, konstruksyon, at auditing ng mga proyekto.
Bagaman tumanggi siyang palitan si Bonoan, handa si Singson na pamunuan ang isang independent panel na magsisiyasat sa mga anomalya sa flood control projects, pro bono.
“All of these suggestions, lumalabas ako at nagsasalita dahil may suporta ako mula sa Management Association of the Philippines at iba pang private sector executives na nagsasabing enough is enough,” dagdag niya.
Si Singson ay nagsilbi bilang DPWH Secretary mula 2010 hanggang 2016 sa ilalim ni dating Pangulong Benigno Aquino III at nagbalik sa pribadong sektor pagkatapos nito bilang executive sa iba’t ibang kumpanya.
About the Author
