ORLANDO, FLORIDA — Muling pangungunahan ni Carlo Biado, ang bagong kampeon sa World Pool Championship, ang delegasyon ng Pilipinas sa darating na 2025 Florida Open Pool Championship na gaganapin mula Agosto 5 hanggang 10 sa Caribe Royale Resort, Orlando.
Pasok na ang mga pangalan ng mga kalahok sa prestihiyosong 256-player tournament na may kabuuang premyo na $200,000 o katumbas ng humigit-kumulang P11.4 milyon, kung saan ang magiging kampeon ay uuwi ng $40,000 o halos P2.2 milyon.
Kasama ni Biado sa nine-ball event ang labing-isa pang Filipino cue artists, kabilang sina Bernie Regalario (World Championship semifinalist), Jefrey Roda (quarterfinalist), Johann Chua, AJ Manas (teen sensation), Patrick Gonzales, Lee Vann Corteza, Roland Garcia, Mark Muir, Marvin Asis, Michael Baoanan at Harry Vergara.
Pawang matitinik na kalaban ang sasalubong sa mga Pinoy sa opening round:
- Biado vs. Sam Henderson (USA)
- Asis vs. Landon Hollingsworth (USA)
- Baoanan vs. Erick Poveda (USA)
- Gonzales vs. Elvin Rodriguez (USA)
- Corteza vs. Charles Seeger (USA)
- Chua vs. Rick Miller (USA)
- Manas vs. Lance Schofield (USA)
- Garcia vs. Daniel Sanchez (USA)
- Regalario vs. Toh Lian Han (Singapore)
- Muir vs. Edward Koyongian (Indonesia)
- Vergara vs. Shahram Changezi (Pakistan)
- Roda vs. Yash Ajmera (India)
Makakaharap ng mga Pinoy ang ilan sa pinakamalalakas na pangalan sa international pool scene tulad nina Fedor Gorst (World Championship finalist), Shane Van Boening, Francisco Sanchez Ruiz at Earl Strickland.
Layunin ni Biado at ng kanyang mga kababayang manlalaro na ipagpatuloy ang legacy ng mga Filipino cue masters at muling ipagmalaki ang galing ng Pilipinas sa larangan ng bilyar. (RON TOLENTINO)
About the Author
