148 Taong Pamana ni Manuel L. Quezon: Ang Pangarap na Hindi Binabagyo -

PITAK FILIPINO
Ni Socrates L. Pimentel

BAGYO man, bulaklak pa rin.

Maulan. Mahangin. Mabagyo. Subalit may isang bagay na mas malakas pa sa bagyo: Ang Pag-alala. Dahil pag-usapan ay si Pangulong Manuel Luis Quezon (1878-1944, nanilbihan 1935-44), walang ulan, walang hangin, walang bagyo ang kayang pumigil sa taumbayan.

Ipinagdiwang noong 19 Agosto 2026 Miyerkoles ang ika-148 anibersaryo ng kapanganakan ng Amang nagbigay pangalan sa lungsod. At saan pa? Sa puso mismo ng QC: Dambana ni Quezon sa Quezon Memorial Circle.

Pinangunahan ng Pambansang Komisyong Pangkasaysayan ng Pilipinas (NHCP, itinatag 1933) ang paggunita. At sumunod ang QC. Dumalo ang mga kawani ng Pamahalaang Lungsod Quezon, Komisyon sa Wikang Filipino (KWF, itinatag 1936 at nireporma 1991), QCPD, DepEd QC, QC Boy Scouts, Meralco, Knights of Columbus, Inner Wheel, UAP-QC, at marami pang iba.

Mula gobyerno hanggang pribadong sektor. Mula guro hanggang mag-aaral. Iisang bulaklak. Iisang mensahe: Salamat, Pangulo.

Binuksan ni NHCP Executive Director Carminda Arevalo ang programa sa isang linyang tumagos: “Hinangad ni Quezon bilang bahagi ng pagsusulong ng katarungang panlipunan, na magkaroon ng isang lugar kung saan ang mga uring manggagawa ay maaaring mabuhay, mag-aral, at maghanapbuhay.” Kaya ang lahat ay narito ngayon.

Ang Lungsod Quezon ang kaniyang pangarap. Isang lungsod para sa tao. Para sa manggagawa. Kaya naman dinaluhan ni Mayor Joy Belmonte ang paggunita at ipinakilala ang panauhing pandangal: Atty. Jose Sonny G. Matula ng Federation of Free Workers. Patunay na 148 taon na ang nakalipas ay buhay pa rin ang laban ni Quezon para sa manggagawa.

Pinasigla ng QC University Chorale at Dance Troupe ang programa. At nagpahatid ng mensahe mismo ang apo sa tuhod ng Pangulo, si Bb. Yael Buencamino-Borromeo.

Sa gitna ng ulan ay umiinit ang programa. Dahil ang alaala ni Quezon, nakakainit ng puso. 148 taon na. Subalit ang pangarap ni Quezon para sa QC at Pilipinas? Buhay na buhay pa rin.

Sa pagtutulungan ng Pamahalaang Lungsod Quezon at NHCP, napatunayan natin ngayong araw: Ang bagyo, lilipas. Ang pamana, mananatili.

Dahil si Quezon ay hindi lang pangalan sa mapa. Siya ang diwa. Siya ang QC.